जनकपुरधाम, १२ चैत । चैत १९ गतेदेखि सञ्चालन हुने माध्यमिक शिक्षा परीक्षा (एसईई) मा यस वर्ष मधेश प्रदेशबाट ८७ हजार ५ सय ९१ जना विद्यार्थी सहभागी हुने भएका छन् ।
शिक्षा विकास निर्देशनालयका अनुसार यो संख्या गत वर्षको तुलनामा केही घटेको हो । अघिल्लो वर्ष ८८ हजार ८५८ जना विद्यार्थी परीक्षामा सहभागी भएका थिए ।
परीक्षालाई व्यवस्थित, मर्यादित र प्रभावकारी बनाउन प्रदेशभर २ सय ९९ वटा परीक्षा केन्द्र तोकिएको छ । ती केन्द्रहरूमा १ हजार ३ सय १६ विद्यालयका विद्यार्थी सहभागी हुनेछन् ।
परीक्षा सञ्चालनका लागि आवश्यक जनशक्ति व्यवस्थापन पनि गरिएको छ । निर्देशनालयका अनुसार २ सय ९९ केन्द्राध्यक्ष, ४ सय ३३ सहायक केन्द्राध्यक्ष, ४ हजार २ सय ३५ निरीक्षक, ७ सय ३४ परीक्षा सहायक तथा १ हजार ६०३ कार्यालय सहयोगी परिचालन गरिनेछ ।
सुरक्षा व्यवस्थालाई सुदृढ बनाउन ४ हजार ४ सय ८५ जना सुरक्षाकर्मी खटाइने तयारी गरिएको छ ।
यसैबीच, मधेश प्रदेशको शिक्षा तथा संस्कृति मन्त्रालय, शिक्षा विकास निर्देशनालय र शिक्षा तालिम केन्द्रलगायतका निकायको समन्वयमा प्रदेशस्तरीय अनुगमन टोली समेत गठन गरिएको छ ।
शिक्षा निर्देशक महेन्द्र महतोका अनुसार अनुगमन र समन्वयलाई प्रभावकारी बनाउँदै परीक्षा निष्पक्ष र व्यवस्थित रूपमा सम्पन्न गरिने लक्ष्य राखिएको छ ।
यो विषयमा आफ्नो प्रतिक्रिया दिनुहोस् !