जनकपुरधाम । धनुषा जिल्लामा पछिल्लो समय अपराध तथा दुर्घटनाका घटनाहरू उल्लेख्य रूपमा बढेको देखिएको छ।
जिल्ला प्रहरी कार्यालयले सार्वजनिक गरेको फागुन महिनाको विवरणअनुसार विभिन्न प्रकृतिका कुल १०९ वटा मुद्दा दर्ता भएका छन्।
प्रहरीका अनुसार हत्या, चोरी, आर्थिक अनियमितता, सामाजिक अपराध र सवारीसम्बन्धी घटनाहरू मुख्य रूपमा बढेका छन्। जिल्ला प्रहरी कार्यालय धनुषाका प्रवक्ता गणेश बहादुर बमले अपराध नियन्त्रण र अनुसन्धानलाई प्रभावकारी बनाउन गस्ती, चेकजाँच र सीमावर्ती सुरक्षा निकायसँग समन्वयलाई तीव्र बनाइएको जानकारी दिए।
आत्महत्याका घटना बढदाे
उक्त अवधिमा १२ जनाले आत्महत्या गरेका छन्। झुण्डिएर तथा विष सेवनका घटनामा विभिन्न उमेर समूहका व्यक्ति संलग्न रहेका छन्। किशोरदेखि मध्यम उमेर समूहसम्मका मानिसमा यस्तो प्रवृत्ति देखिनुले सामाजिक चिन्ताको विषय बनेको छ।
महिला तथा बालबालिकासम्बन्धी घटनामा पनि वृद्धि देखिएको छ। एक महिनामा मात्रै घरेलु हिंसाका ४१ उजुरी दर्ता भएका छन्। तीमध्ये केही मिलापत्रमार्फत टुंग्याइएको छ भने एउटा मुद्दा अदालतसम्म पुगेको छ।
हराइरहेका र लागूऔषधका घटना
प्रहरी तथ्यांकअनुसार ४५ जना हराएको सूचना दर्ता भएकोमा ८ जनालाई मात्रै फेला पारिएको छ। साथै लागूऔषधसम्बन्धी ४ मुद्दा दर्ता भई ५ जना पक्राउ परेका छन्। ठूलो मात्रामा गाँजा तथा अन्य प्रतिबन्धित पदार्थसमेत बरामद गरिएको प्रहरीले जनाएको छ।
सवारी दुर्घटना उच्च
फागुन महिनामा १०५ वटा सवारी दुर्घटना भएका छन्, जसमा ५ जनाको ज्यान गएको छ भने १७९ जना घाइते भएका छन्। ट्राफिक नियम उल्लंघन गर्ने सयौं सवारीसाधनलाई कारबाही गर्दै लाखौं रुपैयाँ जरिवाना असुल गरिएको छ।
आगलागी र विपद् व्यवस्थापन
उक्त अवधिमा १६ वटा आगलागीका घटना भएका छन्। ती घटनामा घाइते भएकाहरूको उद्धार तथा नियन्त्रणका लागि ठूलो संख्यामा प्रहरी परिचालन गरिएको थियो।
समग्रमा हेर्दा धनुषामा अपराध र दुर्घटनाको ग्राफ उकालो लागे पनि प्रहरी सक्रियता बढाउँदै नियन्त्रण प्रयास जारी रहेको देखिन्छ।
यो विषयमा आफ्नो प्रतिक्रिया दिनुहोस् !