जनकपुरधाम, फागुन ५ गते । मधेश प्रदेशका मुख्यमन्त्री कृष्णप्रसाद यादवले मैथिली भाषालाई कामकाजी भाषा बनाउने प्रतिबद्धता जनाएका छन् ।
जनकपुरधाममा मंगलबारदेखि आयाेजित चारदिने ‘जनकपुरधाम साहित्य, कला तथा अन्तर्राष्ट्रिय नाट्य महोत्सवकाे पांचाै संस्करणलाई सम्बाेधन गर्दै भने मैथिली भाषा, साहित्य तथा संस्कृतिको संरक्षण र संवर्द्धनका लागि सरकार प्रतिबद्ध छ र यसलाई स्थापित गर्न कामकाजी भाषा बनाइनेछ ।
कार्यक्रममा शिक्षा तथा संस्कृति मन्त्री रानी शर्मा तिवारीले मैथिली कला, साहित्य र सांस्कृतिक पहिचानलाई अन्तर्राष्ट्रिय स्तरमा स्थापित गर्न यस्ता अन्तर्राष्ट्रिय नाट्य महोत्सवले टेवा पुग्ने धारणा राखिन् ।
त्यसैगरी, जनकपुरधाम उपमहानगरपालिकाका नगरप्रमुख मनोज कुमार साहले स्थानीय तहले मैथिली भाषा र संस्कृतिको जगेर्नाका लागि निरन्तर कार्यक्रम सञ्चालन गरिरहेको बताए ।
मैथिली विकास कोषका अध्यक्ष जीवनाथ चौधरीको अध्यक्षतामा सम्पन्न उद्घाटन समारोहमा भूमि व्यवस्था, कृषि तथा सहकारी मन्त्री श्याम प्रसाद पट्टेल, पूर्वमन्त्री रामसरोज यादव, वरिष्ठ साहित्यकार डा. राजेन्द्र विमल लगायतले मैथिली भाषाको ऐतिहासिक पृष्ठभूमि, समृद्ध साहित्यिक परम्परा र वर्तमान चुनौतीबारे धारणा राखेका थिए ।
महोत्सवको मुख्य आकर्षणका रूपमा मंगलबार बिहान जनकपुरधामस्थित रंगभूमि मैदानबाट सांस्कृतिक झाँकीसहित भव्य शोभायात्रा निकालिएको थियो ।
मैथिली भाषा, साहित्य र संस्कृतिको प्रवर्द्धन गर्ने उद्देश्यसहित मैथिली विकास कोषको आयोजना तथा मधेश प्रदेश सरकारको शिक्षा तथा संस्कृति मन्त्रालय, जनकपुरधाम उपमहानगरपालिका र राजर्षि जनक विश्वविद्यालय लगायतका निकायको सह–आयोजनामा महोत्सवको शुभारम्भ गरिएको हो ।
यो विषयमा आफ्नो प्रतिक्रिया दिनुहोस् !