जनकपुरधाम, पुस २५ गते । चालू आर्थिक वर्ष २०८२/०८३ मा जनकपुरधाम उपमहानगरपालिकाको आय व्ययमा १७ प्रतिशतकाे हाराहारीमा प्रगति देखिएकाे छ ।
शुक्रवार सम्पन्न १४ औँ नगरसभा सम्पन्न नगर सभामा उपमेयर किशाेरी साहले प्रस्तुत आय व्यय विवरणमा चालू आ.व. काे गत पांच महिनामा उपमहानगरपालिकाले १६.९५ प्रतिशत प्रगति भएकाे भनिएकाे छ ।
नगरसभामा आर्थिक वर्ष २०८२/०८३ को आय–व्यय विवरण, वार्षिक नीति तथा कार्यक्रमको अर्धवार्षिक कार्यान्वयन प्रगति र बजेट खर्चको अवस्था प्रस्तुत तथा छलफल गरिएको छ ।
नगरसभामा प्रस्तुत आय–व्यय विवरण अनुसार उपमहानगरपालिकाले चालु आर्थिक वर्षका लागि विभिन्न शीर्षकबाट ९९ करोड ४१ लाख २५ हजार रुपैयाँभन्दा बढी आय रहेकाे छ भने ४१ कराेड ७ हजार रूपैयाभन्दा बढी व्यय गरेको जनाइएकाे छ ।
संघीय तथा प्रदेश सरकारबाट प्राप्त हुने अनुदान, स्थानीय कर तथा शुल्क, राजस्व बाँडफाँड र आन्तरिक स्रोतलाई आयका प्रमुख आधारका रूपमा प्रस्तुत गरिएको छ ।
आयतर्फ संघीय अनुदान, प्रदेश अनुदान, राजस्व बाँडफाँड तथा स्थानीय स्रोतबाट रकम संकलन भएको छ भने व्ययतर्फ चालु खर्च, सेवा प्रवाह, पूर्वाधार तथा विकास योजनामा बजेट खर्च गरिएको जनाइएको छ । केही शीर्षकमा आय संकलन र खर्च अपेक्षित गतिमा अघि नबढेको भन्दै सुधार आवश्यक रहेको निष्कर्ष नगरसभाले निकालेको छ ।
नगरसभामा सेवा प्रवाह सुधार, राजस्व संकलनलाई प्रभावकारी बनाउने, कर प्रणालीलाई क्रमशः अनलाइन प्रणालीमा लैजाने, विकास आयोजनामा गुणस्तर र समयपालनामा जोड दिने तथा प्रशासनिक व्यवस्थापन सुदृढ गर्ने विषयमा समेत छलफल भएको छ ।
सीमित स्रोतका कारण सबै योजना एकैपटक कार्यान्वयन गर्न कठिनाइ भएको, ठेक्का तथा व्यवस्थापनसम्बन्धी चुनौती र जनशक्ति व्यवस्थापनमा समस्या रहेको अवस्थाबारे पनि नगरसभामा जानकारी गराइएको मेयर मनाेज साहले जनाएकाे छ ।
नगर नेतृत्वले आगामी दिनमा आन्तरिक आय वृद्धि, करको दायरा विस्तार, खर्चमा मितव्ययिता, पारदर्शिता र जवाफदेहिता बढाउने प्रतिबद्धता व्यक्त गरेको छ । नगरसभाले प्रस्तुत आय–व्यय विवरणलाई अनुमोदन गर्दै कार्यान्वयनलाई थप प्रभावकारी बनाउने निर्णयसमेत गरिएकाे मेयर साहले बताएका छन् ।
यो विषयमा आफ्नो प्रतिक्रिया दिनुहोस् !