जनकपुरधाम, कात्तिक २२ गते। प्रदेश सभामा बोल्ने अधिकार नपाएको आक्रोशमा मधेश प्रदेशका नेकपा (माओवादी केन्द्र) का सांसद रहबर अन्सारीले रोष्टममै आफ्नै मुखमा कालिख पोतेका छन्।
शनिबार बसेको प्रदेश सभा बैठकमा सभामुखले बोल्न अनुमति नदिएको भन्दै सांसद अन्सारीले रोष्टममै उभिएर विरोध स्वरूप मुखमा कालो मोसो दलेका हुन्। उनले भने, “आज म सार्वजनिक अपराध स्वीकार गर्न आएको छु। म पक्ष र विपक्ष कुनैमा मतदान गर्दिनँ, कुनै पनि पार्टीको कुरा मान्दिनँ।”
तर, उनले बोल्दै गर्दा सभामुख रामचन्द्र मण्डलले समय सकिएको भन्दै उनको माइक बन्द गरिदिए। माइक काटिएपछि अन्सारीले भने, “हामी कस्ता सांसद हौं, जनताको कुरा त के, आफ्नै कुरा राख्न पनि नपाउने? बोल्ने मुख थिच्ने यस्तो प्रवृत्ति संघीयता र लोकतन्त्रकै अपमान हो।”
सदनमा उनले मधेशका जनताको अवस्थाबारे प्रश्न गर्दै भने, “मधेशका ६४ लाख जनताको अवस्था के छ? जेन–जी आन्दोलनले व्यवस्था बदलियो, तर अवस्था बदलिएन।”
अन्सारीले कालिख पोतेसँगै माओवादी केन्द्रकी अर्की सांसद माला कर्णले पनि समर्थन जनाउँदै भनिन्, “सांसदलाई बोल्ने अधिकार खोस्नु संघीयता र लोकतन्त्रविरुद्धको प्रवृत्ति हो।”
दुवै जना सांसदले कुनै दललाई राजीनामा नदिने घोषणा गर्दै सदन बहिष्कार गरेपछि सत्तारूढ दलका आग्रहमा प्रदेश सभा बैठक ३० मिनेटका लागि स्थगित गरिएको थियो।
यो विषयमा आफ्नो प्रतिक्रिया दिनुहोस् !