सांसद किरणले ससुरा–सासुलाई घर निकालेको आरोप, आफूलाई बदनाम गर्न खोजिएको किरणकाे प्रतिक्रिया

जनकपुरधाम, कात्तिक १३ गते । मधेश प्रदेश सभा सदस्य किरण कुमारी साहमाथि आफ्ना ससुरा–सासुलाई घरबाट निकालेर घरजग्गा कब्जा गरेको गम्भीर आरोप लागेको छ ।

सांसद साहका ससुरा देवनारायण प्रसाद साह र सासु शान्ति देवीले सार्वजनिक रूपमा आरोप लगाउँदै आफूहरूलाई घरबाट निकाला गरिएको बताएका छन् ।

सप्तरीको राजविराजस्थित सिराहा रोडमा रहेको घरमा बस्दै आएका ८० वर्षीय देवनारायण साहले सामाजिक सञ्जालमार्फत एक भिडियो जारी गर्दै उक्त आरोप सार्वजनिक गरेका हुन्। उनका अनुसार सो घर उनले ससुराली पक्षबाट दानस्वरूप पाएका जग्गामा निर्माण गरेका थिए, तर सांसद किरण साह र उनका श्रीमान् इन्जिनियर विनोद साहले आफूलाई कुटपिट गर्दै घरबाट निकालिदिएका हुन् ।

उनले दाबी गरेका छन्, “असोज २० गते मन्दिर गएको बेला काठको आलमीरा फोडेर नागरिकता र जग्गासम्बन्धी कागजात चोरी गरियो। जब सोध्दा छोरा र बुहारीले मलाई कुटपिट गर्दै घर निकाला गरे।” देवनारायण साहका अनुसार, यस विषयमा असोज २२ गते जिल्ला प्रशासन कार्यालयमा उजुरी दर्ता गरिएको र कात्तिक २ गते पुनः कुटपिट भएको पनि आरोप छ ।

देवनारायण साहले भिडियोमा भनेका छन्, “मैले बुहारीलाई पढाएर वकिल बनाइदिएँ, तर अहिले उनी नै मलाई घर निकाला गर्दै मेरो सम्पत्तिमा कब्जा गर्न खोज्दै छिन्।” उनले सांसद साहमाथि उच्च पदको दुरुपयोग गरी प्रशासन र न्यायालयमा प्रभाव जमाएको आरोपसमेत लगाएका छन् ।

यस विषयमा प्रतिक्रिया दिँदै सांसद किरण कुमारी साहले आरोप असत्य रहेको बताएकी छिन्। उनले भनिन्, “यो मेरो चरित्र र राजनीतिक छविलाई बदनाम गर्न नियोजित रूपमा लगाइएको आरोप हो। यो विवाद घरभित्रको सामान्य पारिवारिक झगडा हो, जसलाई बाहिर ल्याएर ठूलो बनाइएको हो ।”

जनता समाजवादी पार्टी (जसपा) नेपालकी समानुपातिक प्रदेश सभा सदस्य साहका अनुसार, घरमा चाडपर्वको सरसफाईका क्रममा ससुरा र श्रीमानबीच सामान्य विवाद भएको मात्र हो। उनले आरोप लगाइन्, “मेरो नन्द माधुरी साह जनमत पार्टीसँग जोडिएकी नेतृ हुन्। उहाँकै प्रभावमा पर्नुहुँदै ससुराले मेरो नाम यस विवादमा तानेका हुन् ।”

सांसद साहले थप स्पष्ट पारिन्, “ससुरा–सासु आफैं छोरी माधुरीको घरमा गएका हुन्, हामीले घर निकालेका होइनौं। पटक–पटक फर्किन आग्रह गर्दा पनि उहाँहरू आउनु भएको छैन। प्रहरीमा उजुरी परेपछि पनि छलफलका लागि बोलाउँदा उपस्थित हुनुभएको छैन ।”

उनका अनुसार, कुटपिटको आरोप पनि गलत छ। “मेरो श्रीमान्ले होइन, उल्टै ससुराले उहाँलाई कुटेका हुन्। म त झगडा रोक्न मात्रै गएकी थिएँ,” सांसद साहले भनिन् ।

यस विषयमा जिल्ला प्रशासन कार्यालयले उजुरी दर्ता गरेको पुष्टि भएको छ। हाल प्रहरी प्रशासनले दुबै पक्षलाई बोलाएर छलफलको तयारी गरेको बताइएको छ।