जनकपुरधाम, असाेज २९ गते । मधेश प्रदेश सरकारको मुख्यमन्त्रीमा लोकतान्त्रिक समाजवादी पार्टी (लोसपा) का नेता जितेन्द्रप्रसाद सोनार (सोनल) नियुक्त भएका छन् । उनी मधेशका चाैथाे मुख्यमन्त्रीकाे रूपमा नियुक्त भएकाे हाे ।
नेपालको संविधानको धारा १६८ को उपधारा २ बमोजिम प्रदेश प्रमुख सुमित्रा सुवेदी भण्डारीले सोनललाई बुधबार साँझ मुख्यमन्त्री नियुक्त गरेकी हुन् ।
५ दलको समर्थनमा सोनलले ५६ प्रदेशसभा सदस्यको हस्ताक्षरसहित प्रदेश प्रमुख कार्यालयमा मुख्यमन्त्रीका लागि दाबी पेस गरेका थिए । कांग्रेसमा कृष्णप्रसाद यादवले पनि अर्को दाबी पेस गरेका थिए ।
कांग्रेस नाराबाजी गर्दै
उता कानुन विपरित साेनललाई प्रदेश प्रमुखले साेनललाई मुख्यमन्त्रीमा नियुक्त गरेकाे भन्दै कांग्रेसका नेता कार्यकर्ताले मधेश प्रदेश प्रमुख कार्यालयमा नाराबाजी गरेका छन् ।
उनीहरूले प्रदेश प्रमुख सुमित्रा सुवेदी भण्डारीले लोसपा नेता सोनललाई मुख्यमन्त्रीमा गरेको नियुक्ति असंवैधानिक रहेको भन्दै बदरको मागसहित प्रदर्शन गरेका हुन् ।
प्रदेश प्रमुख भण्डारीले केहीबेर अगाडि मात्रै लोसपाका नेता जितेन्द्र सोनललाई नयाँ मुख्यमन्त्रीमा नियुक्त गरेकी छन् ।
कांग्रेस संसदीय दलका नेता कृष्णप्रसाद यादवले समेत जनमतका १३ सांसदको हस्ताक्षरसहित ५८ सांसद आफूसँग रहेको दाबीसहित मुख्यमन्त्री नियुक्तिका लागि प्रदेश प्रमुख कार्यालयमा दाबी पेस गरेका थिए ।
निर्वाचन कार्यालयमा जनमतका केही सांसदले जनस्वराज पार्टीमा समेत सनाखत गरिसकेको अवस्थामा प्रदेश प्रमुखले हतारमा मुख्यमन्त्री नियुक्त गरेको कांग्रेसको आरोप छ ।
जनमतका सतिशकुमार सिंह र त्रिभुवन साह निर्वाचन कार्यालयमा जनस्वराजको पक्षमा हस्ताक्षर गर्न जाने क्रममा जनमतका नेता तथा कार्यकर्ताहरूले अवरोध गर्न खोजेका थिए । सो क्रममा सामान्य झडप समेत भएको थियो ।
जनमत पार्टी फुटिसकेको अवस्थामा प्रदेश प्रमुखले असंवैधानिक बाटोबाट सोनललाई नियुक्ति गरेको भन्दै कांग्रेसले नियुक्ति तत्काल सच्याउन माग राखेका छन् ।
नयाँ मुख्यमन्त्रीमा यादव र सोनलको दाबी परेपछि दुवै पक्षका नेताहरू छलफलका लागि प्रदेश प्रमुख कार्यालय पुगेका थिए । सो क्रममा तनाव भएको थियो । दुवै पक्षबीच हुन सक्ने सम्भावित घटनालाई मध्यनजर राखेर प्रदेश प्रमुखको कार्यालय परिसरमा ठूलो संख्यामा नेपाली सेना, सशस्त्र प्रहरी र नेपाल प्रहरी सुरक्षाका लागि खटाइएकाे थियाे ।
कसले कति मन्त्री पाउने
मधेश प्रदेशमा मन्त्रालय बाँडफाँटको संख्या टुंगियो, मन्त्रालय र मन्त्रीको नाम टुंगिन बाँकी रहेकाे बुझिएकाे छ । सोनललाई मुख्यमन्त्री बनाइने भएपछि उनको पार्टीले जम्मा एक मन्त्रालय पाउने भएको छ ।
जसपाको भागमा ४ मन्त्रालय परेका छन्, जनमतले ३ पाएको छ । नेकपा माओवादी केन्द्र र एकीकृत समाजवादीलाई १-१ मन्त्रालय टुंग्याइएको छ । ती दलले पाउने मन्त्रालय र मन्त्री हुनेको नाम टुंगो लागेको छैन ।
यो विषयमा आफ्नो प्रतिक्रिया दिनुहोस् !