जनकपुरधाम, असोज २२ गते । कांग्रेसले मधेश प्रदेश सरकारबाट समर्थन फिर्ता लिएको दुई साता नबित्दै एमालेले पनि सरकारबाट समर्थन फिर्ता लिएको छ ।
यी दुवै दलले सरकारबाट समर्थन फिर्ता लिएपछि मधेश प्रदेशको राजनीतिक समीकरणमा ठूलो परिवर्तन आउने अवस्था देखिएको छ । बुधबार नेकपा एमालेले मुख्यमन्त्री सतिश कुमार सिंह नेतृत्वको सरकारलाई दिएको समर्थन फिर्ता लिएको मंगलवार बसेको बैठकपछि आधिकारिक रुपमा उक्त निर्णय सार्वजनिक गरिएको हो ।
मुख्यमन्त्री सिंहलाई दिएको समर्थन फिर्ता लिँदै एमालेले हालको सरकारसँग अबको सहकार्य सम्भव नरहेको जनाएको छ । मुख्यमन्त्री सिंहको नेतृत्वमा बनेको सरकारले जनअपेक्षा अनुसार काम नगरेको र राजनीतिक नैतिकता हराएको निष्कर्षसहित समर्थन फिर्ता लिएको नेकपा एमालेका एक नेताले बताए ।
एमालेको समर्थन फिर्तासँगै मधेश प्रदेश सरकार अल्पमतमा परेको छ । एमाले जस्तो ठूलो दलको समर्थन गुमेपछि विपक्षी दलहरूलाई सत्ता समीकरण फेरबदल गर्ने अवसर मिलेको छ ।
एमालेले कांग्रेस नेतृत्वको नयाँ सरकार गठनको तयारीमा लागेको छ । यसअघि नै कांग्रेस नेतृत्वमा सरकार गठनका लागि वर्तमान सरकार नेतृत्वकर्ता जनमत पार्टी र एमालेसहितका तीनवटै दलबीच सहमति भइसकेको छ । सम्भावित गठबन्धनका लागि नेपाली कांग्रेसले नेकपा माओवादी केन्द्र र स्वतन्त्र सांसदहरूसँग छलफल अघि बढाइएको छ ।
यता लोकतान्त्रिक समाजवादी पार्टी (लोसपा) नेपालले पनि विगतमा भएका सहमति अनुसार मधेश प्रदेशमा मधेशी दलको सरकार हुनुपर्नेमा जनमत र जसपाले सरकार नेतृत्व गरिसकेकाले अब लोसपाको पालो रहेको भनी दाबी गरिरहेका छन् । जसपा र माओवादी केन्द्रले सर्वदलीय सरकार गठन हुनुपर्ने पक्षमा छन् ।
यो विषयमा आफ्नो प्रतिक्रिया दिनुहोस् !