जनकपुरधाम, भदौ २९ गते । जेनजी आन्दोलनको नाममा जनकपुरधामको विभिन्न स्थानमा आगजनी, तोडफोडका साथै लुटपाट गरेका घटनामा संलग्न रहेको आरोपमा धनुषा प्रहरीले ६ जना र विभिन्न कारागारबाट फरार भएकासहित २० जनालाई पक्राउ गरेका छन् ।
प्रहरीको अनुसार जेनजीको आन्दोलन पश्चात सार्वजनिक तथा निजी सम्पतिमा आगजानी र तोडपोड सहित लुटपाट घटनामा संलग्न रहेको आरोपमा ६ जना, केन्द्रिय कारागारबाट ४ जना विदेशी नागरिक र सिन्धुली तथा जलेश्वर कारागारबाट फरार भएका मध्ये १० जना गरी २० जना पक्राउ परेको हो ।
जेनजी आन्दोलनको क्रममा भदौ २४ गते धनुषाको विभिन्न स्थानमा तोडफोड तथा आगजनीमा संलग्न रहेका मध्ये ६ जनालाई नियन्त्रणमा लिएको जिल्ला प्रहरी कार्यालय धनुषाका प्रहरी उपरीक्षक नरहरी रेग्मीले जानकारी दिएका छन् ।
उनका अनुसार मधेस लोकसेवा आयोगको कार्यालयमा तोडफोडका साथै हतियार लुटपाटमा संलग्न रहेको आरोपमा दुई जनालाई पक्राउ गरिएको छ । पक्राउ पर्नेमा शहीदनर नगरपालिका ३ का शिवम साह र जनकपुरधाम १३ का काले पटेल रहेका छन् । त्यस्तै बलवा प्रहरी चौकीमा तोडफोड तथा आगजनीमा संलग्न रहेको आरोपमा निरज मिश्र र कृष्ण यादवलाई पक्राउ गरिएको प्रहरी उपरीक्षक रेग्मीले बताए ।
यता मधेस भवन भित्र विभिन्न मन्त्रालयमा समेत तोडफोड तथा आगजनी भएको थियो । मन्त्रालय तोडफोड तथा आगजनीका साथै सरकारी सामान चोरी गरेको आरोपमा समेत दुई जना पक्राउ परेका हुन् । पक्राउ पर्नेमा चन्दनकुमार साह र गौतम भगत रहेका छन् । उनीहरुको साथबाट २ वटा कम्प्युटर, प्रिन्टर लगायतका सरकारी सामाग्री बरामद गरिएको प्रहरीले जनाएको छ ।
पक्राउ परेकाहरुविरुद्ध कानूनी प्रकृया अगाडी बढाएर कारबाही गरिने प्रहरी उपरीक्षक रेग्मीले जानकारी दिए । जिल्ला प्रहरी कार्यालय धनुषाले काठमाडौँस्थित केन्द्रीय कारागारबाट भागेका ४ जना विदेशी नागरिकहरुलाई समेत पक्राउ गरेको छ । पक्राउ पर्नेमा ३ जना नाइजेरियन नागरिक र १ जना ब्राजिलियन नागरिक रहेका छन् ।
उनीहरुलाई भदौ २७ गते नेपाल भारतको सीमानाका धनुषाको महिनाथपुर र सवैलावाट प्रहरीले पक्राउ गरिएको उनले जानकारी दिएका छन । पक्राउ पर्नेमा नाइजेरियाका वर्ष ३८ को मो. लामिन्स डाबो, वर्ष ३५ को ग्लोरी बडे, वर्ष ५५ को ईमानुअल ओवुडा उजेईग्बे र वर्ष २५ का ब्राजिलका लारेशन ब्रिटो रहेका छन् ।
उनीहरू भारततर्फ भाग्न थालेको बेलामा धनुषा प्रहरीले पक्राउ गरेको हो । उनीहरू लागु औषधको कारोबारमा केन्द्रीय कारागारमा सजाय पाएकामा जेनजीको आन्दोलनको क्रममा गत मङ्गलवार फरार भएका थिए । भारतको बाटो भएर आफ्नो देश फर्किने उद्देश्यले काठमाडौँबाट विभिन्न जिल्लाको बाटो भएर ती विदेशी कैदीहरू धनुषा जिल्ला जिल्लामा आइपुगेको अनुमान प्रहरीले गरेको छ ।
सिन्धुली तथा महोत्तरीको जलेश्वर कारागारबाट फरार भएका १० जना अन्य नेपाली बन्दीहरूलाई विभिन्न मितिमा पक्राउ गरेको छ । सिन्धुली तथा जलेश्वर कारागारबाट फरार भएका बन्दीहरूलाई २६ गतेदेखि आजको मितिसम्ममा पक्राउ गरेको धनुषाका प्रहरी नायव उपरीक्षक बरुण बहादुर सिंहले जानकारी दिए । पक्राउ पर्ने नेपाली कैदीहरू माथि कर्तव्य ज्यान, जबरजस्ती करणी, ज्यान उद्योग तथा लागु औषधका आरोपीहरू रहेका छन् ।
प्रहरी उपरीक्षक रेग्मीका अनुसार रेल्वे प्रहरी चौकीमा पूर्ण रुपमा क्षति भएको छ भने ट्राफिक कार्यालय धनुषा, जिरोमाइल प्रहरी चौकी, मुजेलिया प्रहरी चौकी लगायतको प्रहरी चौकीमा समेत क्षति पुगेको छ ।
यो विषयमा आफ्नो प्रतिक्रिया दिनुहोस् !