जनकपुरधाम, भदाै २४ गते । अन्तत: धानमन्त्री केपी शर्लेमा ओलीले राजीनामा दिएका छन् । लगातारको आन्दोलन र चौतर्फी दबाबबीच प्रधानमन्त्रीले पदबाट राजीनामा दिएका छन् ।
सोमबारदेखि सुरु भएको जेनजी आन्दोलनको क्रममा पहिलो दिन नै कलिला युवा पुस्तामाथि गोली चलाएर डेढ दर्जनभन्दा बढी युवाको हत्याको आदेश दिएपछि चौतर्फी आलोचना खेपिरहेका प्रधानमन्त्रीले अन्ततः मंगलबार पद त्याग्ने निर्णय गरेका हुन् ।
यसअघि सोमबार साँझ भएको मन्त्रिपरिषद बैठकमा भने ओली निकै अहंकारी रुपमा प्रस्तुत भएका थिए । उनले राजीनामा नदिने अडान लिएका थिए । उनले गृहमन्त्री रमेश लेखकलाई समेत राजीनामा नदिन भनेका थिए । तर, लेखकले भने राजीनामा दिए ।
मन्त्रिपरिषद बैठकपछि संचारकर्मीसँग कुरा गर्दै संचारमन्त्री तथा सरकारका प्रवक्ता पृथ्वी सुब्बा गुरुङले पनि ठाडो स्वरमा प्रधानमन्त्रीको राजीनामा नआउने बताएका थिए । प्रधानमन्त्री मंगलबार बिहानसम्म पनि राजीनामाको मुडमा थिएनन् ।
तर, मंगलबार देशैभरी निरन्तर प्रदर्शन, शीर्ष नेताहरुका घरमा आगजनी, सिंहदरबार र संसद भवनमा आगजनी भएपछि भने प्रधानमन्त्री आन्दोलनलाई दबाउन नसकिने निष्कर्षमा पुगेर अन्ततः घुँडा टेकेका छन् । यससँगै दशकौंमा पहिलो पटक बर्बर राज्य आतंक मच्चाएका प्रधानमन्त्रीको अवसान भएको छ ।
यो विषयमा आफ्नो प्रतिक्रिया दिनुहोस् !