जनकपुरधाम, साउन ३० गते । जग्गा विवाद प्रकरणमा पत्रकारहरुलाई कुटपिट तथा दुव्र्यवहार गर्ने वकिलहरुलाई कारवाही नगरिएको भन्दै स्थानीय प्रशासन विरुद्ध जनकपुरधाममा पत्रकारहरु आन्दोलनको घोषणा गरेका छन् ।
शनिवार मधेश प्रदेश पत्रकार महासंघको अगुवाईमा जिल्ला शाखा धनुषाद्वारा आयोजित पेशागत वर्गीय संगठनहरुसँगको छलफलमा पत्रकारहरुमाथि संघातिक आक्रमण गर्ने नेपाल बार एशोसिएसनका पदाधिकरीहरु तथा आबद्ध व्यक्तिहरु विरुद्ध किटानी जाहेरी दिएपनि कुनै सुनुवाई नगरेको भन्दै न्यायका लागि दबाव बनाउन चरणबद्ध रुपमा आन्दोलनमा निर्णय गरेका हुन् ।
शुक्रवार जनकपुरधाम आएको बेला प्रधानमन्त्री केपी शर्मा ओलीले प्रहरी प्रशासनलाई समेत पत्रकारहरुलाई कुटपिट गर्नेलाई कारवाही गर्न मंचबाटै सार्वजनिक रुपमा निर्देशन दिएपनि स्थानीय प्रशासनले ती निर्देशनलाई अटेर गर्दै आएकाले न्यायका लागि स्थानीय प्रशासन विरुद्ध आन्दोलन बाहेक अर्को विकल्प नरहेकोका निष्कर्ष निकालेका थिए ।
आन्दोलनको सुरुवात प्रदेशका राजधानी जनकपुरधाम भएकाले जनकपुरधामबाटै गर्ने निष्कर्षसहित भोली आइतवार बिहान ११ बजेदेखि १२ बजेसम्म एक घण्टा जिल्ला प्रशासन कार्यालय अगाडि धर्ना कार्यक्रम गर्ने तय गरिएको छ ।
यो आन्दोलनले स्थानीय प्रशासन कारवाही गरेन भने सशक्त रुपमा आन्दोलनलाई अघि बढाउंदै प्रदेशका जिल्लाहरुमा जिल्ला प्रशासन कार्यालय र प्रहरी विरुद्ध आन्दोलनमा होमिनेछ । साथै बैठकबाट पत्रकार महासंघको विरुद्ध जाने र पत्रकारलाई कुटने वकिललाई सहयोग गर्ने बिचौलिया पत्रकारविरुद्ध कारवाही प्रक्रिया अघि बढाउन पत्रकारहरुले माग समेत नेपाल पत्रकार महासंघसँग गरेका थिए ।
पत्रकार संगठनहरूले संयुक्तरुपमा धर्ना कार्यक्रमको घोषणा गर्दै घटनामा संलग्नहरुमाथि तत्काल कानुनी कारबाही गर्न सरकारलाई चेतावनी दिएका छन् । उनीहरूले कारबाही ढिलाइ भए चरणबद्ध आन्दोलनका कार्यक्रम घोषणा गर्दै प्रदेश र देशव्यापी आन्दोलनसम्म जाने बताएका छन् ।
पत्रकारहरुले शान्तिपूर्ण आन्दोलनमार्फत प्रेस स्वतन्त्रता, गुठी सम्पत्ति संरक्षण र कानुनी शासनको सुनिश्चितताका लागि सरकार गम्भीर नरहेको आरोप लगाउंदै आन्दोलनमा जानु परेको पत्रकार महासंघ मधेश प्रदेश समितिका अध्यक्ष श्याम बञ्जाराले बताएका छन् । उनले आन्दोलनलाई सघाउन सबै पत्रकारसँग आग्रह गर्दै न्यायका लागि सहयोग गर्न सबै पेशागत संघ संगठन र नागरिक समाजलाई अपिल गरेका छन् ।
बैठकमा नेपाल पत्रकार महासंघ केन्द्रिय सदस्य राजेश कुमार कर्ण, प्रदेश समितिका उपाध्यक्ष ज्योति झा, सचिव हदिश खुद्दार, मधेशी पत्रकार समाज मधेश प्रदेशका अध्यक्ष विरेन्द्र रमण, समाजका धनुषा अध्यक्ष सुभाष कर्ण, नेपाल पत्रकार महासंघका उपाध्यक्ष अवधेश कामत, प्रेस युनियन धनुषाका अध्यक्ष राजन सिंह, प्रेस चौतारी धनुषाका नवीन प्रियदर्शी, प्रेस सेन्टर धनुषाका अध्यक्ष दिपक मिश्र, प्रेस मञ्च धनुषाका अध्यक्ष अर्जुन मण्डल लगायत उपस्थित पत्रकारहरुले आन्दोलनप्रति समर्थन तथा ऐक्यबद्धता जनाएका छन् ।
कानूनी प्रक्रिया पुरा गरी गुठी संस्थानसँग पत्रकारहरुको छाता संगठन पत्रकार महासंघ मधेश प्रदेश समितिको भवन निर्माणका लिजमा लिइएको जग्गा नेपाल बार एशोसिएसन धनुषाले पार्किङ्ग स्थलको नाममा बलजफ्ती कब्जा गर्न खोजेका छन् । पत्रकार महासंघले सुरक्षाका लागि आफ्नो जग्गामा तारबार गर्न खोज्दा बारसँग आबद्ध वकिलहरुले पत्रकारहरुलाई कुटपिट तथा दुव्र्यवहार गरेका थिए ।
वकिलहरुको कुटाईबाट पत्रकार महासंघ मधेश प्रदेश समितिका अध्यक्ष श्याम बञ्जारा, उपाध्यक्ष ज्योति झा, महासचिव शैलेन्द्र क्रान्ति, पत्रकार दिवाकर साह, अनिल निराला, विनिता यादव घाइते भएका थिए । कुटपिटबाट महासचिव शैलेन्द्र क्रान्तिको खुट्टा भांचिएको छ भने, दिवाकर साहको टाउकोमा गम्भीर चोट लागेको छ । हाल तिनीहरु उपचारमै छन् ।
यो विषयमा आफ्नो प्रतिक्रिया दिनुहोस् !