जनकपुरधाम, साउन २७ गते । पिडितहरूकाे न्यायका लागि पैरवी गर्ने जनकपुरधामका कालाेकाेटधारी वकिलहरूकाे कालाे चरित्र उदांगाे भएकाे छ ।
बलजफ्ती गैरकानुनी रूपमा जग्गा कब्जा गर्ने निहुंमा कालाेकाेटधारी भनिने न्यायका लागि बहसकर्ता वकिलहरूकाे संगठन नेपाल बार एशाेसिएसन धनुषाका अध्यक्ष विमल मिश्रकाे नेतृत्वमा ६०/७० जन वकिलहरूकाे झुण्डले मंगलवार पत्रकारहरूमाथि आक्रमण र महिला पत्रकारहरूसंग दुर्व्यवहार गरेका छन् ।
अतिक्रमणकारी वकिलहरुकाे आक्रमणमा परी नेपाल पत्रकार महासंघ, मधेस प्रदेशका अध्यक्षसहित आधा दर्जन पत्रकार घाइते भएका छन् । घटनाको मूल कारण भने पत्रकार महसंघ मधेश प्रदेश समितिले गुठी संस्थानसंग लिजमा लिएको जग्गा बलजफ्ती हाम्राे पार्किङ हाे भनी कब्जा गर्ने हो ।
महासंघले जनकपुरधाम उपमहानगरपालिका–४ स्थित ४ कट्ठा जग्गा गुठी संस्थानबाट २० वर्षका लागि ३ लाख एकहजार एक सय रूपैया लिजमा लिएको हाे । साे जग्गामा हाम्राे हाे बिना कुनै प्रमाणकाे आफ्नाे भनी अधिकार जमाउंदै कब्जा गर्न साे जग्गामा पार्किङ्ग गर्न थालेका छन् ।
मंगलबार बिहान उक्त जग्गामा तारबार लगाउने काम भइरहेको समयमा नेपाल बार एशोसिएसन, जनकपुरधामका वकिलहरुको झुण्डले पत्रकारहरूमाथि आक्रमण गरेको थियो ।
आक्रमणमा परेर नेपाल पत्रकार महासंघ मधेसका अध्यक्ष श्यामप्रसाद बनजारा, महासचिव शैलेन्द्र महतो, उपाध्यक्ष ज्योती झा, पत्रकार दिवाकर राय, अनिलकुमार निराला र विनिता यादव घाइते भएका छन् । कुटपिटबाट महासचिव महतोको पैतालाको हड्डीसमेत भाँचिएको छ ।
महासंघका अनुसार गुठी संस्थानसँग ४ कट्ठा जग्गाको सम्झौता गत साउन १९ गते गरिएको हो । यसअघि गोरखापत्रमा प्रकाशित सूचना अनुसार जेठ ७ गते तीनवटा जग्गाका लागि प्रस्ताव आह्वान गरिएको थियो । विभिन्न संघसंस्थाले प्रस्ताव पेस गरे पनि पत्रकार महासंघको प्रस्ताव छनौटमा परेको थियो ।
महासचिव महतोका अनुसार साउन २ गते गुठी संस्थानले गोरखापत्रमा महासंघको प्रस्ताव स्वीकृत भएको सूचना प्रकाशित गरेको थियो भने साउन १९ गते सम्झौता भएकाे हाे ।
नेपाल बार एसोसिएसन जनकपुरधामले उक्त जग्गा आफ्नो पार्किङ स्थल भएको दाबी गर्दै सम्झौतापछि एकतर्फी रूपमा साउन २० गते ‘सवारी पार्किङको निर्णय’ गरेर त्यसमा बारले फलामे पिलर गाडी घेराबार गरेर कब्जा गर्न खाेज्याे ।
विवाद चर्किएपछि जिल्ला प्रशासन कार्यालयको मध्यस्थतामा बार र महासंघबीच बाटोको आवश्यकता भए फुकाइदिने, पछाडिको जग्गा उपलब्ध भए बारलाई प्राथमिकता दिने र अन्य विवाद कानुनी बाटोबाट समाधान गर्ने सहमति भयो ।
सहमतिअनुसार पिलर हटाउने भनिए पनि बारले घेराबार हटाएन । बरु, आइतबार उच्च अदालतमा महासंघविरुद्ध उत्प्रेशनको रिट दायर गर्याे ।
अरूकाे जग्गा हतियाउने कालाे करतुत बार एशाेसिएसनकाे याे नाैलाे हाेइन, यसअघि बारसंगै टांसिएका खाली रहेका गुठीकाे जग्गामा पार्किङ्ग गर्दागर्दै अहिले त्यसमा तीन तल्ले भवन बनाएर १०/१५ हजारकाे दरले भाडा लगाउंदै छ ।
यो विषयमा आफ्नो प्रतिक्रिया दिनुहोस् !