नवीन सिंह/ जनकपुरधाम, साउन २० गते । मेयरका तानाशाही र एकलौटी शासन विरुद्ध नगराईन नगरपालिकाका जनप्रतिनिधिहरु उपमेयरको नेतृत्वमा आन्दोलनमा उत्रेका छन् ।
ती विवादकै कारण चालु आर्थिक वर्षको बजेटका लािग नगरसभा समेत नगरपालिकाले गर्न पाएको छैन । नगरसभा गर्न नपाएका कारण नगरपालिकाको सम्पूर्ण आर्थिक कारोबार ठप्प भई बन्धक बन्न गएको छ ।
यी समस्याका प्रमुख कारण मेयर विनय यादवको रहेको भन्ने आरोप उपमेयर राधा देवी यादवले मंगलवार एक पत्रकार सम्मेलन आयोजना गरी लगाएकी छिन् । उनले भनिन् मेयर यादवले आफ्ना निहित स्वार्थका कारण बहुमतको कदर नगरेका उनको तानाशाही र मनपर्दी विरुद्ध आफूहरु आन्दोलनमा उत्रेका हौं ।
नगराईन नगरपालिकाकी उपमेयर यादवले कांग्रेसबाट निर्वाचित मेयर विनयकुमार यादवले बहुमत कार्यपालिका सदस्यहरुलाई बेवास्ता र आफ्नो अधिकार क्षेत्रमा गरी मनोमानी ढंगले हस्तक्षेप गर्दै आएको कारण आफूहरुले बैठक बहिष्कार गर्दै आएको गरेको बताइन् ।
उनले संशोधित स्थानीय सरकार ऐन सञ्चालन ऐन, २०७६ खारेज गरी विगतका स्थानीय तह सञ्चालन सम्बन्धी ऐन २०७४ कार्यान्वयन गर्नमा तानाशाही प्रवृति देखाउंदै कार्यान्वयनमा आनाकानी गर्दै आएकाले उनी नसचिंदा नीति तथा कार्यक्रम एवं बजेट सभा समेत हुन नसकेको आरोप समेत लगाईन ।
पत्रकार सम्मेलनमा नगराईन नगरपालिकाका उपमेयर राधादेवी यादव, वडा नम्बर ५ का वडाध्यक्ष रामनारायण मुखिया, वडा नम्बर ६ का वडाध्यक्ष ललित साह, वडा नम्बर ८ का वडाध्यक्ष संजय राउत, वडा नम्बर ९ का वडाध्यक्ष प्रमोदकुमार राउत र एमालेबाट निर्वाचित ८ जना कार्यपालिका सदस्यलगायतले पनि कार्यविधि संशोधन सहित प्रमुख प्रशासकीय अधिकृत रामगुलाम कर्णलाई हटाउने माग गरे ।
पत्रकार सम्मेलनमा उपस्थित सबै जनप्रतिनिधिले कांग्रेस सदस्य समेत रहेका प्रमुख प्रशासकीय अधिकृत कर्णलाई राख्न मेयर यादवले केन्द्रबाट पठाइएका अधिकृतलाई हाजिर हुन नदिई बाटैबाट फर्काउने गरेको आरोप लगाउंदै जबसम्म कर्णलाई हटाएर उपसह सचिव स्तरको कर्मचारीलाई नपठाएसम्म हामी आन्दोलनमै रहने चेतावनी दिए ।
उता मेयर विनय कुमार यादवले नगरसभा गर्नको लागि आफूहरु केही बजेट संचालनसम्बन्धी कार्यविधि संशोधन बाहेक अन्य विभिन्न विषयमा सहमति गर्न सकिने बताए ।
उनले विगतमा समेत उपमेयर राधादेवी यादवले करिब नौ महिनासम्म नै नगराईन नगरपालिकालाई बन्धकी बनाएको बताउँदै यसपाली पनि बन्धकी बनाएर नगरको सम्पूर्ण आर्थिक कारोबार ठप्प पार्न खोजेको आरोप लगाए ।
मंगलवार बस्ने भनिएको कार्यपालिका बैठक नेकपा एमालेबाट निर्वाचित भएका जनप्रतिनिधिहरु सहभागी नभएपछि बैठक स्थगित गरिएको छ ।
हुनत मेयर र उपमेयरबीचको विवाद तिनीहरु कार्यकाल सम्हालेदेखि नै चल्दै आएको गत वर्षपनि विवादकै कारण समयमा नगर सभा हुन सकेको थिए । अन्ततः कात्तिक महिनामा दुवै पक्षबीच सर्वपक्षीय सहमति पश्चात विवाद साम्य भएको थियो । तर सो सहमतिको केही दिनमै पुनः विवाद उत्पन्न भएको हो ।
यो विषयमा आफ्नो प्रतिक्रिया दिनुहोस् !