जनकपुरधाम, साउन १४ गते । विगत केही दिनदेखि मधेसका विभिन्न जिल्लामा सिँचाइ र खानेपानी आभावले कष्टकर बनेकाे जनजीवन बारे सरकारलाई ध्यानाकर्षण गराइएकाे छ ।
लगातारको खडेरीका कारण खेत सुक्खा परेका छन्, कृषकहरू धान रोप्न नसकी निराश भएका छन् भने सर्वसाधारण पिउने पानीको अभाव कष्टकर जीवन बिताउन बाध्य रहेकाे बारे नेपाली कांग्रेसका केन्द्रीय सह-महामन्त्री तथा पूर्व खानेपानी मन्त्री महेन्द्र यादवले सरकालाई ध्यानाकर्षण गराउँदै तत्काल र दीर्घकालीन समाधान गर्न आग्रह गरेका छन्।
गम्भीर संकटको मूल्यांकन गर्दै नेपाल सरकार तथा मधेस प्रदेश सरकारले मधेसलाई सुख्खा ग्रस्त क्षेत्र घोषणा गरेका छन्। यस निर्णयसँगै राहत तथा पुनर्स्थापना कार्यक्रमको अपेक्षा गरिँदैछ। तर अहिलेसम्म नेपाल सरकारबाट कुनै ठाेस याेजना ल्याइएकाे छैन ।
सह-महामन्त्री यादवले भने “मधेसको जनजीवन र कृषि प्रणाली जोगाउन अहिलेको सबैभन्दा ठूलो आवश्यकता भनेकै डिप बोरिङ, सिँचाइ, नदी नियन्त्रण तथा कुलो निर्माणमा प्राथमिकता दिई बजेट खर्च गर्ने हो। अन्य सबै विकास योजना केही समय थाती राखी सिधै किसानका पीडामा मलम लगाउने कार्य गर्नुपर्छ।”
पूर्वमन्त्री समेत रहेका यादवले नेपाल सरकार र मधेस प्रदेश सरकारलाई किसानमुखी नीति अवलम्बन गर्न, डुबानजस्ता विपद् नियन्त्रणका उपाय तत्काल लागू गर्न तथा सुख्खा क्षेत्रका लागि आपतकालीन राहत योजना कार्यान्वयन गर्न विशेष जोड दिएका छन्।
यसैबीच सुख्खा र खडेरीले पानी आभावकाे दृष्टिगत गर्दै मधेश सरकारका ऊर्जा, सिचाई तथा खानेपानी मन्त्रालयले खानेपानी तथा सिचाई डिप बाेरिङ्ग जडान याेजना शुरू गरिसकेका छन् ।
आपातकालिन अवस्थाकाे मध्यनजर गर्दै खानेपानी तथा सिचाईकाे आभाव हुन नदिन यश मन्त्रालयबाट प्रदेशका प्रत्येक वडामा डिप बाेरिङ्ग जडान याेजना सुरू गरिसकिएकाे ऊर्जा, सिचाई तथा खानेपानी मन्त्री शेष नारायण यादवले बताएका छन् ।
स्थानीयबासीले नेपाल सरकारको घोषणालाई स्वागत गरेपनि व्यवहारमा नउतारेसम्म त्यसकाे कुनै अर्थ नरहेकाले दृढ इच्छाशक्तिले छिटो कार्यान्वयन आवश्यक रहेको बताएका छन् ।
यो विषयमा आफ्नो प्रतिक्रिया दिनुहोस् !