जनकपुरधाम, साउन १३ गते । चुरे संरक्षण अभियन्ता सुनिल यादवले मधेश प्रदेश सरकार विरूद्ध जनकपुरधाममा आँखामा कालोपट्टी बाँधेर एकल प्रदर्शन गरेका छन् ।
चुरे विनाशकै कारण मधेसमा पानीकाे संकट उत्पन्न भएपनि मधेश सरकार अन्धाे भएर बसेकाे भन्दै ध्यानाकर्षण गराउन उनले आँखामा कालोपट्टी बाँधेर जनक चोकदेखि मधेस प्रदेशको मुख्यमन्त्री कार्यालयसम्म पैदल यात्रा गर्दै शान्तिपूर्ण प्रदर्शन गर्दै पुगेका थिए ।
मुख्यमन्त्री सतिश सिंहलाई आंखामा कालाेपट्टी बांधेर ज्ञापनपत्र बुझाउन खाेज्दा प्रहरीले उनलाई मुख्यमन्त्री कार्यालयमा छिर्न दिएन । कार्यालयमा प्रवेश गर्न नसकेपछि अभियन्ता सुनिल एक घण्टा बढी समयसम्म मुख्यमन्त्री कार्यालय अगाडि रहेकाे रेलवे ट्रयाकमै धर्नामा बसेका थिए ।
अन्नतः मुख्यमन्त्री सतिश सिंह जनकपुरमा छैन भनी कार्यालयका उपसचिव वासुदेव मल्ल रेलवे ट्रयाकमा आई साे ज्ञापनपत्र बुझेका थिए । ज्ञापनपत्र बुझ्दै उनले यसबारे मुख्यमन्त्रीलाई जानकारी गराउने सहयाेगका लागि दातृ निकायसंग सहयाेगका आग्रह गर्ने निर्णय भइसकेकाे जानकारी दिए ।
डेढ दशकदेखि चुरे क्षेत्रको संरक्षणमा सक्रिय यादवले यो संकट आफूले वर्षौंदेखि चेतावनी दिँदै आएको विषय भएको बताउँदै भने, “आज जुन पानीको समस्या देखिएको छ, त्यो मेरो माग मात्र नभई सम्पूर्ण मधेसवासीको साझा आवाज बनेको छ, जसमा म खुशी छु ।”
हालसालै मधेसका धेरै ठाउँमा खानेपानीको चरम अभाव देखिएको छ । स्थानीय जनता प्यासै मेटाउन संघर्षरत छन् भने कृषकहरू सिँचाइ अभावमा खेत सुक्न थालेको गुनासो गरिरहेका छन् । यादवले चुरे क्षेत्रको दोहन रोकेरमात्र यो संकटको दीर्घकालीन समाधान सम्भव हुने बताएका छन् ।
उनले मधेस प्रदेश सरकारलाई गम्भीर नभएको आरोप लगाउँदै विभिन्न मागहरूसहित मुख्यमन्त्री कार्यालयमा ज्ञापनपत्र समेत बुझाएका छन् । “सरकारले चुरे विनाश र पानी संकटलाई प्राथमिकतामा राख्नुपर्छ,” उनले माग गरे ।
यस प्रदर्शनले चुरे संरक्षण र जल स्रोत संरक्षणको महत्व पुनः सार्वजनिक बहसको केन्द्रमा ल्याएको छ ।
यो विषयमा आफ्नो प्रतिक्रिया दिनुहोस् !