जनकपुरधाम, साउन १२ गते । जनकपुरधाम उपमहानगरपालिका–४ स्थित राराब कलेज नजिकै एक महिला घरमै मृत फेला परेकी छन् ।
रातिको समयमा रहस्यमय तरिकाले मृत भेटिएकी २३ वर्षीया शोभा मण्डलले आत्महत्या गरिएको भन्ने कुराले सबैलाई चकित बनाएको छ । मृतककी माइती पक्षले थप दाइजोका लागि हत्या गरिएको भन्ने आरोप लगाइरहेको छ ।
शोभाको विवाह पाँच वर्षअघि साढे तीन लाख नगद र साढे तीन तोला सुन दाइजो दिएर चन्दन मण्डलसँग भएको थियो । उनीहरूको एक चार वर्षको छोरी समेत भइसकेको अवस्थामा चन्दनले थप दाइजोको माग गर्दै पटक पटक यातना दिदैं आएको मृतकको माइती पक्षले आरोप लगाएका छन् ।
जिल्ला प्रहरी कार्यालय धनुषाका प्रहरी निरीक्षक अनिल बैठाले राति साढे १२ बजेतिर शोभाले झुण्डिएर आत्महत्या गरेको जानकारी प्रहरीलाई प्राप्त भएको बताए । तर, प्रहरी टोली घटनास्थलमा पुग्दा मृतकको शव ओछ्यानमा फेला परेको थियो ।
‘घरपरिवारको भनाइ अनुसार उनीहरू झुण्डिएको अवस्थामा देखेपछि पासो काटेर ओछ्यानमा राखिएको हो,’ निरीक्षक बैठाले भने, ‘तर, घटनाको वास्तविकता पोस्टमार्टम रिपोर्टपछि मात्रै खुल्नेछ ।’
तर शोभाका बुबा रामकिसुन मण्डलले छोरीमाथि विवाहपछिदेखि नै दाइजोको विषयमा झै–झगडा, कुटपिट र मानसिक यातना दिइँदै आएको आरोप लगाएका छन् । चन्दनको यो दोश्रो विवाह रहेको थियो, पहिलो श्रीमतिलाई पनि तिनले मारेको थियो, आफूहरुलाई जानकारी नरहेको अवस्थामा छोरीको बिहे गरेका थियौं । आफ्नो छोरीको हत्यापछि यो कुरा थाहा पाएको मृतक शोभाको बुवा रामकिसुनले बताए ।
उनले भने ‘दाइजोको लागि बारम्बार विवाद हुन्थ्यो, छोरीले हामीलाई केही पटक फोनमा बताएकी थिइन् । अन्ततः छोरीलाई ज्यान गुमाउनुपर्याे ।’ उनका अनुसार शोभाको श्रीमान चन्दन मण्डलसहित ससुरा पक्षका सदस्यहरूविरुद्ध कानुनी कारबाहीको माग गर्दै प्रहरीसमक्ष उजुरी दिइएको छ ।
उजुरी दर्ता गराउन गएका पिडीत पक्षमाथि प्रहरीले लाठीचार्ज समेत गरेका छन् । उजुरी दर्ता गराउन जाँदा उजुरी दर्ता गर्न नमानेपछि तिनीहरुले होहल्ला गरेपछि प्रहरीले तिनीहरुलाई कार्यालय परिसरबाट बाहिर निकाल्ने बहानामा लाठी चार्ज गरेको बुझिएको छ ।
घटनाको विवरण हेर्दा हत्या गरिएको देखिएपनि प्रहरी समेतले आत्महत्या नै रहेको संकेत दिइरहेका छन् । प्रहरी अधिकारीले आरोपित पक्षको भनाई अनुसार आत्महत्या गरेको देखिएको हो । तर अनुसन्धानपछि वास्तविक कुरा बाहिर बताएका छन् । मधेशमा आत्महत्या भनिएका घटनाको सूक्ष्म अनुसन्धान हुन नसक्दा हत्या जस्ता गम्भीर घटना प्रहरीको मिलोमतोमा अनुसन्धान फितलो बनाई आत्महत्यामा परिणत गरिदै आएको छ ।
यो विषयमा आफ्नो प्रतिक्रिया दिनुहोस् !