जनकपुरधाम, साउन ९ गते । मधेश आन्दोलनमा संलग्न नेताहरूलाई राज्यले झुटा मुद्दामा फसाएर अन्याय गरेको आरोप लगाउंदै ती मुद्दा खारेज गर्नुपर्ने लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले माग गरेका छन् ।
महोत्तरीको मटिहानीमा आयोजित एक सार्वजनिक कार्यक्रममा प्रधानमन्त्री केपी शर्मा ओलीको उपस्थितिमा अध्यक्ष ठाकुरले आन्दोलनकारीमाथि लगाइएका झुठा मुद्दा तत्काल फिर्ता लिन माग गरे ।
‘राजनीतिक परिवर्तन आन्दोलनको उपलब्धि हो,’ ठाकुरले भने, ‘मधेश आन्दोलनका क्रममा महोत्तरीका चार नेतालाई षड्यन्त्रपूर्वक जन्मकैदको सजाय दिइएको छ, केही अहिले पनि जेलमा छन् । झुटा मुद्दा फिर्ता नलिएसम्म यो परिवर्तन अधुरो रहन्छ ।’
ठाकुरले लोसपाका प्रदेश सांसद अभिराम शर्मा, जलेश्वरका पूर्वमेयर रामशंकर मिश्रसहित पार्टीका नेताहरू सुरेश पाण्डे र धर्मेन्द्र राउतलाई राज्यले षड्यन्त्रपूर्वक फसाएको दाबी गरे । भीडले गराएका घटनालाई आधार बनाएर आन्दोलनकारीलाई फसाइएको उनको आरोप थियो ।
अध्यक्ष ठाकुरले प्रधानमन्त्री ओलीकै कार्यकालमा ३ वर्ष कैद र १० लाख जरिवाना सुनाइएका अन्य केही मुद्दाहरू फिर्ता गरिएको प्रसंग उल्लेख गर्दै बाँकी मुद्दाहरू पनि फिर्ता लिन आग्रह गरे । ‘प्रधानमन्त्रीज्यू, जसरी केही मुद्दा फिर्ता लिइयो, बाँकी मुद्दा पनि लिईदिनुस्,’ ठाकुरले आग्रह गरे । उनले राज्यद्वारा अन्यायमा परेकाहरूलाई न्याय दिलाउन सबै दलले संवेदनशील हुनुपर्ने धारणा राखे ।
यो विषयमा आफ्नो प्रतिक्रिया दिनुहोस् !