जनकपुरधाम, साउन ८ गते । प्रदेशमा परेको खडेरीको दृष्टिगत मधेश प्रदेशमा चालु आर्थिक वर्षको कार्यक्रमहरु खानेपानीबाट शुरु गरिएको छ ।
मधेश प्रदेश सरकारका ऊर्जा, सिचाई तथा खानेपानी मन्त्रालयले चालु आर्थिक वर्षको योजना खानेपानी डिप बोरिङ्ग जडानबाट शुरु गरेको हो ।
धनुषाको मिथिलाबिहारी नगरपालिका वडा नम्बर २ परशुराम तलाउ स्थित मन्दिरमा साउने सोमवारी मेलामा आउने श्रद्धालुहरुलाई खानेपानीको समस्या भइरहेको दृष्टिगत गर्दै ऊर्जा, सिचाई तथा खानेपानी मन्त्रालयले खानेपानी डिप बोरिङ्ग जडान कार्य थालेका छन् ।
सो खानेपानी डिप बोरिङ्ग जडान कार्य ऊर्जा, सिचाई तथा खानेपानी मन्त्री शेष नारायण यादवको प्रमुख आतिथ्यमा आयोजित एक कार्यक्रमका बीच मन्दिरका पुजारी राधामोहन दासद्वारा विधिवत रुपमा पूजापाठ गरी बिहीवारदेखि शुरु गरिएको हो । आउँदो सोमवारसम्म ती डिप बोरिङ्ग जडान भइसक्नुपर्ने जनाइएको छ ।
मन्त्री यादवले भने प्रत्येक साउने सोमवारी मेलामा भगवान महादेवलाई जल अर्पण गर्न यहाँ हजारौको संख्यामा श्रद्धालु भक्तजनहरु आउने गरेका छन् । अहिले चर्को गर्मीका कारणले तिनीहरुलाई खानेपानीको समस्या भइरहेको स्थानीयको आग्रहमा खानेपानी डिप बोरिङ्ग यहाँ जडान गर्न लागिएको हो ।
सो कार्यक्रममा सहभागी स्थानीयवासीहरुले खडेरीले सिचाई तथा खानेपानी दुवैमा समस्या भएको पीडा सुनाएका थिए । उनीहरुले चापाकलको पानी सुकेर निकै सास्ती भएको कारण तत्कालका लागि खानेपानी डिप बोरिङ्ग जडान विभिन्न वडामा गरिदिन आग्रह गरेका थिए ।
स्थानीयको पीडा सुन्दै मन्त्री यादवले सबैमा प्रदेश सरकारले खानेपानी बोरिङ्ग जडान गर्न नसकेपनि पहिलाे चरणमा सबभन्दा बढी आवश्यकता भएकाे ठाउंमा र त्यसपछि आवश्यक अन्य ठाउंहरूमा जडान गर्ने कार्यक्रम अघि बढाइसकेका छाैं, चांडै नै कार्यक्रम संचालन गरिने जानकारी दिए ।
प्रदेशमा परेको खडेरीले परेको पानी समस्याले प्रदेशलाई सुख्खा क्षेत्र घोषणा गरिसकेको छ भने संघीय सरकार समेतले मधेश प्रदेशलाई तीन महिनाका लागि संकटग्रस्त क्षेत्र घोषणा गरेको हो । संकटग्रस्त क्षेत्र घोषणा गरिएपनि संघीय सरकारले पानी समस्या समाधानका लागि कुनै प्याकेज घोषणा गरेको छैन ।
हुनत प्रदेश सरकारले तत्कालका लागि खानेपानी समस्या समाधानका लागि प्रदेशका प्रत्येक वडामा खानेपानी डिप बोरिङ्ग जडानका योजना अघि सारेको ऊर्जा, सिचाई तथा खानेपानी मन्त्री यादवले बताएका छन् । उनले भने खडेरी परेको कारण प्रदेशमा सिचाई तथा खानेपानी दुवैको समस्या उत्पन्न भएको हो । तर तत्काल खानेपानी योजना अघि बढाएका हौं ।
सो कार्यक्रममा नेपाली कांग्रेसका नेताहरु श्याम यादव, घनश्याम यादव, अनिल यादव, पदारथ यादव लगायत स्थानीयवासीहरुको उल्लेखनीय सहभागिता रहेको थियो ।
यो विषयमा आफ्नो प्रतिक्रिया दिनुहोस् !