जनकपुरधाम, साउन ४ गते । भू–उपयोग क्षेत्र (जग्गा) वर्गीकरण अद्यावधिक स्थानीय तहले नगरेका कारण नापी कार्यालय धनुषाले साउन १ गतेदेखि किताकाट कार्य पूर्ण रूपमा बन्द गरिने स्पष्ट पारेको छ ।
नेपाल राजपत्र भाग ३, खण्ड ७४, संख्या २६ मिति २०८१/५/२७ मा प्रकाशित भू–उपयोग नियमावली २०७९ को नियम १२, उपनियम ४ (ख) अनुसार भू–उपयोग क्षेत्र निर्धारणको लागि आवश्यक नक्सा वा विवरणमध्ये कुनै एक अद्यावधिक नगरेका नगरपालिका र गाउँपालिकाहरूले बर्गीकरण,कितागत विवरण, हार्डकपी न त डिजिटल ढाँचा (डेटाबेस) समयमै कार्यालयमा उपलब्ध गराएको पाइएको छ ।
यसै सन्दर्भमा नापी कार्यालय धनुषाले जनकपुरधाम उपमहानगरपालिकालाई औपचारिक पत्र पठाई जानकारी गराएको छ । साथै सो पत्रको बोधार्थ जिल्ला प्रशासन कार्यालय धनुषा, जिल्ला समन्वय समिति धनुषा र भूसुधार तथा मालपोत कार्यालय धनुषालाई समेत जानकारी दिइएको छ ।
नापी कार्यालयले भू–उपयोग नीतिअनुसार सबै स्थानीय तहलाई वर्गीकरणसहितको कितागत विवरण अद्यावधिक गरी पठाउन पटक–पटक आग्रह गर्दै आएको थियो । तर प्राविधिक सामग्री र सूचना समयमै नपुगेकाले कार्यालयले बाध्यात्मक रूपमा आगामी साउन १ गतेदेखि जिल्लाभर सबै प्रकारका किताकाट प्रक्रिया बन्द गर्ने निर्णय सार्वजनिक रूपमा जानकारी गराएको हो ।
नापी कार्यालय धनुषाले सम्बन्धित स्थानीय तहहरूलाई यथाशीघ्र विवरण अद्यावधिक गरि पठाउन पुनः आग्रह गर्दै, समयमै जानकारी नपठाउनेको कारणले उत्पन्न हुने समस्या तथा अवरोधको जिम्मेवारी स्वयं ती स्थानीय तहहरूले बेहोर्नुपर्ने चेतावनी समेत दिएको छ ।
यो विषयमा आफ्नो प्रतिक्रिया दिनुहोस् !