जनकपुरधाम, असार ३० गते । मधेश प्रदेश सरकारका ऊर्जा, सिचाई तथा खानेपानी मन्त्री शेष नारायण यादवकाे विशेष पहलमा जनकपुरधाम उपमहानगरपालिका–२१, कुर्थास्थित वाटीका चौकदेखि तपनपुर सडक खण्डकाे निर्माण कार्य शुरू भएकाे छ ।
नेपाली कांग्रेसका सह-महामन्त्री एवम् पूर्व संघीय खानेपानी तथा सरसफाई मन्त्री महेन्द्र यादवको प्रमुख आतिथ्यमा आज विहानआयाेजित एक भव्य कार्यक्रमका बीच साे सडक खण्डकाे शिलान्यास गरिएकाे छ ।
प्रमुख अतिथि सहमहामन्त्री महेन्द्र यादव, विशिष्ट अतिथिद्वय ऊर्जा, सिचाई तथा खानेपानी मन्त्री शेष नारायण यादव र प्रदेश सभा सदस्य एवं प्रमुख सचेतक कुमरकान्त झाले संयुक्त रूपमा शिलान्यास गरेका हुन् । शिलान्याससंगै विधिवत रूपमा निर्माण कार्य पनि आजैदेखि शुरू गरिएकाे छ ।
मधेश प्रदेश सरकारकाे बहुवर्षिय याेजना एक निर्वाचन क्षेत्र एक सडक कार्यक्रम (दोस्रो चरण) अन्तर्गत ५ किलाेमीटर सडक निर्माणकाे क्रममा मन्त्री यादवकाे निर्वाचन क्षेत्र धनुषाकाे ४(१) मा साे सडक निर्माण हुन लागेकाे हाे ।
सो अवसरमा बोल्दै प्रमुख अतिथि सह-महामन्त्री महेन्द्र यादवले भने स्थानीय पूर्वाधार विकासमा सडक विस्तारको भूमिका अत्यन्त महत्वपूर्ण रहेको उल्लेख गर्दै यस सडक निर्माणले जनकपुरधाम–२१ देखि महाेतरीकाे तपनपुरसम्मका बासिन्दालाई आवागमन, व्यापार तथा सेवा पहुँचमा सहजता ल्याउने विश्वास व्यक्त गरे ।
साे सडक निर्माणकाे ठेक्का डेढ वर्षमा सम्पन्न गर्ने गरि महताे कन्स्ट्रक्सन एण्ड इन्जिनियरिंग कन्सलटेन्सीले १२ कराेड २५ लाखमा पाएका हुन् । खुल्ला ठांउमा १० मीटर कालाेपत्रे र सघन वस्तीमा २५ फिटसम्म पिपिसी ढलान गरिने ठेकेदार कम्पनी कन्सलटेन्सीका प्रतिनिधि ब्रजकिशाेर यादवले जानकारी दिएका छन् ।
कार्यक्रममा विशेष अतिथि समेत रहेका ऊर्जा, सिंचाई तथा खानेपानी मन्त्री शेष नारायण यादवले विकासकाे काममा प्रदेश सरकारले हरेक तत्पर रहेकाे बताए । उनले भने देशमा संघियतापछि प्रदेश सरकारकाे निर्माणले मधेशमा विकासकाे लहर नै आएछ, यही अवस्था विद्यमान रहे प्रदेशमा समृद्धि संगै आर्थिक विकासले फड्काे मार्नेछ ।
साे कार्यक्रममा जनकपुरधाम उपमहानगरपालिका वडा नं. २१ का वडा अध्यक्ष राजु साह, कांग्रेसका युवा नेता घनश्याम यादवसहित कांग्रेसका स्थानीय नेताहरू, सामाजिक अगुवाहरू, युवाहरू, महिलाहरू तथा सर्वसाधारणको उल्लेखनीय उपस्थिति रहेको थियो।
यो विषयमा आफ्नो प्रतिक्रिया दिनुहोस् !