जनकपुरधाम, असार २९ गते । नेकपा (एमाले) का केन्द्रीय सचिव तथा नेता रघुवीर महासेठको रहेको चाइनिज ईंटाभट्टाको घरबाट सशस्त्र प्रहरी बल नेपाल, धनुषा टोलीले ठूलो मात्रामा अवैध काजु बरामद गरेको छ ।
धनुषा निर्वाचन क्षेत्र ४ बाट संघीय सांसद समेत रहेका महासेठको लक्ष्मीनिया गाउँपालिका–७ स्थित चाइनिज ईंटाभट्टा कम्पाउण्डको खाली घरमा लुकाइराखिएको अवस्थामा काजु फेला परेको हो । बुधबार सशस्त्र प्रहरीको टोलीले विशेष सूचनाका आधारमा छापा मार्दै उक्त घरबाट करिब १३ क्विन्टल २० किलो काजु बरामद गरेको हो ।
सशस्त्र प्रहरीको प्रारम्भिक अनुमान अनुसार बरामद काजुको बजार मूल्य करिब १३ लाख २० हजार रुपैयाँ बराबर रहेको छ । बरामद गरिएको काजुलाई आवश्यक अनुसन्धान र कारबाहीका लागि जनकपुर भन्सार कार्यालयमा बुझाइएको सशस्त्र प्रहरी बल धनुषाले जानकारी दिएको छ ।
प्रहरी स्रोतका अनुसार काजु कहाँबाट ल्याइएको हो र कसको संलग्नता छ भन्ने विषयमा थप अनुसन्धान भइरहेको छ ।
यो विषयमा आफ्नो प्रतिक्रिया दिनुहोस् !