जनकपुरधम,असार १६ गते । मधेश प्रदेशका वन तथा वातावरण मन्त्रालयले छानबीब समितिको प्रतिवेदन लुकाएको आरोप लगाइएको छ ।
चुरे तथा बनजङ्गल संरक्षण अभियानका रास्ट्रीय संयोजक सुनिल कुमार यादवले रौतहट डिभिजन वन कार्यालय डेफो हेमन्तले गरेका ‘काण्डै–काण्ड’ सम्बन्धी छानबिन गर्न गठित समितिले प्रतिवेदन बुझाइसके पनि, मन्त्रालयले अझैसम्म त्यसलाई सार्वजनिक नगरेको आरोप लगाएका छन ।
वन तथा वातावरण मन्त्रालयले वन अधिकृत मनोज ठाकुरको संयोजकत्वमा छानबिन समिति गठन गरी उक्त समितिले जेठ ३० गते नै प्रतिवेदन तयार गरी मन्त्रालयमा दर्ता गराएको थियो । प्रतिवेदन सचिव उद्धव घिमिरेलाई तत्कालै बुझाइएको भए तापनि, १५ दिन बितिसक्दा पनि सो प्रतिवेदन प्रदेश सरकारका वन तथा वातावरण मन्त्री माननीय संजय यादवलाई बुझाइएको छैन ।
यसबीचमा प्रतिवेदनलाई दबाबमा राखेर सार्वजनिक नगर्ने प्रयास सचिव उद्धव घिमिरेबाट भएको भन्दै अभियानका संयोजक यादवले आलोचना गरेका छन् । सरकारी छानबिन प्रतिवेदन दबाउने र मन्त्रीसमक्ष समयमै नपेस गर्ने कार्यले सुशासनमाथि गम्भीर प्रश्न खडा गरेको भन्दै यादवले आक्रोश व्यक्त गरेका छन्।
स्थानीय नागरिक, सरोकारवालाहरू तथा वातावरणविद्हरूले सचिव घिमिरेमाथि छानबिन गर्न प्रदेश र संघ सरकारसँग जोडदार माग गरेका छन्। यस्ता गतिविधिले सरकारी संयन्त्रमा पारदर्शिता र जवाफदेहितामा प्रश्न उठाउने देखिएको छ।
यो विषयमा आफ्नो प्रतिक्रिया दिनुहोस् !