जनकपुरधाम, असार ११ गते । जनकपुरधाम उपमहानगरपालिकाले पहिलो पटक उपमेयरकप महिला कबड्डी प्रतियोगिता आयोजना गरेको छ ।
कडा संघर्ष पश्चात यो महिला कबड्डी प्रतियोगिता आयोजना गर्न पाएको भन्दै सो प्रतियोगिताका लागि उपमहानगरपालिका मेयर मनोज साहबाट अवरोध भएको संकेत उपमेयर किशोरी साहले गरे । श्रोतका अनुसार गत आ.व.मै कबड्डी प्रतियोगिताका लागि बजेट छुटयाइएको थियो । तर अन्तिम समयमा आएर मेयर साहले सो चल्न दिएन ।
संचारकर्मीसँगको प्रतिक्रियामा उपमेयर साहले पटक पटक निकै संघर्ष गर्दा यसवर्ष महिला विद्यार्थीहरुका लागि कबड्डी आयोजना गरिएको बताउंदै केही कुराका कारण ढिलाई पनि हुन गएको भन्दै मेयर साहबाट अवरोध श्रृजना भएको संकेत गरे । गत आ.व.मा प्रयास गर्दागर्दै विभिन्न प्रक्रियाको व्यवधान गरी बजेट संचालन हुन नदिएपछि फ्रिज हुन गएको थियो । तर यसपटक आयोजना गर्न सफल भएको हुँ । उनले यो खेलबाट महिला विद्यार्थीहरुको शारिरीक स्फूर्तिसँगै प्रोत्साहित गर्ने विश्वास व्यक्त गरे ।
उपमेयरकप महिला कबड्डी प्रतियोगिताको पहिलो दिनको खेलमा कन्टीर झा मावि र सरस्वती मावि विजयी भएको छ । कन्या मावि जनकपुरलाई कन्टीर झा माविले १८–२३को सेटमा पराजित गरेको छ । त्यस्तै सरस्वती मावि कुवारामपुरले राजर्षि जनक मावि पिडारीलाई १७–११को सेटमा पराजित गरेको हो ।
बिहिबार हुने खेलमा संकट मोचन मावि र याज्ञवल्क्य संस्कृत मावि तथा गोगल प्रसाद मावि र जानकी माविबीच प्रतिस्पर्धा हुनेछ । बुधबारबाट शुरु भएको प्रतियोगितामा जनकपुरधामका विभिन्न १० सामुदायिक माध्यमिक विद्यालयले सहभागिता जनाएको छ ।
प्रत्येक विद्यालयबाट १० जना महिला खेलाडी र १ जना खेल शिक्षकसहितको टोलीको सहभागीता रहेको छ ।
खेलकुद मार्फत महिला सशक्तिकरण र विद्यालयस्तरमै प्रतिस्पर्धाको अवसर सिर्जना गर्ने प्रयासस्वरूप प्रतियोगिता आयोजना गरिएको जनाइए जनकपुरधाम उपमहानगरपालिकाका उपप्रमुख किशोरी साहले बताए । उनले जनकपुरधाम क्षेत्रमा खेलकुदलाई प्रवद्र्धन गर्न यस प्रकारको प्रतियोगिता आवश्यक रहेको बताए ।
यो विषयमा आफ्नो प्रतिक्रिया दिनुहोस् !