जनकपुरधाम, असार ५ गते । बृहत्तर जनकपुर क्षेत्र विकास परिषद् जनकपुरधामका तत्कालीन कार्यकारी निर्देशक बलराम ठाकुरसहित ९ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दर्ता गराएको छ ।
बिहीबार विशेष अदालतमा सार्वजनिक सम्पत्ति हानिनोक्सानी पु¥याएको र आर्थिक अनियमितता गरेको अभियोगमा मुद्दा दायर गराएको हो ।
प्रक्रियाबिना परिषद्को रकम खर्च गरेको, सवारीसाधन खरिद बिक्रीमा अनियमितता गरेको तथा मिलेमतोमा अन्य हिनामिना गरेको पाइएकाले आवश्यक अनुसन्धान गरी मुद्दा दायर गरिएको आयोगले जनाएको छ । आयोगले तत्कालीन कार्यकारी निर्देशक ठाकुरविरुद्ध ५१ लाख ७१ हजार ८८८ रुपैयाँ बराबरको बिगो माग दाबी गरेको छ ।
परिषद्का लेखापाल सावित्री गिरीविरुद्ध ३० लाख ७२ हजार ८४४, प्रशासकीय अधिकृत चिरञ्जीवीराज शर्मा ढुंगानाविरुद्ध १० लाख एक हजार ८७६, कम्प्युटर अधिकृत कृष्णमुरारी सिंहविरुद्ध १४ लाख ९९ हजार, सवारीचालक बिक्कीकुमार चौधरीविरुद्ध कैद सजायको मात्रै माग दाबी गरिएको छ ।
उपभोक्ता समितिका अध्यक्ष विजयकुमार यादव र कोषाध्यक्ष बवितादेवी साहविरुद्ध २० लाख ९९ हजार, निर्माण व्यवसायी जितेन्द्रकुमार यादवविरुद्ध दुई लाख र प्रतिवादी बलराम ठाकुरको श्रीमती इन्दुलेखाकुमारी ठाकुर विरुद्ध ४५ लाख २२ हजार ८४५ रुपैयाँ बराबरको बिगो मागदाबी गरिएको छ ।
उनीहरूबाट बिगोबमोजिमको रकम असुली र कैद सजायको माग गर्दै मुद्दा दायर गरिएको आयोगका सहायक प्रवक्ता देवीप्रसाद थपलियाले जानकारी दिए ।
यो विषयमा आफ्नो प्रतिक्रिया दिनुहोस् !