सिरहा, असार ३ गते । सिरहा जिल्लाका तीन स्थानीय तह जोडने २८ किलोमिटर लामो गोलबजार–लगडी–गदियानी सडक पाँच वर्ष बितिसक्दा पनि अधुरै अवस्थामा छ ।
जिल्लाको गोलबजार नगरपालिका, अर्नमा गाउँपालिका र सिरहा नगरपालिका—लाई जोड्ने ती सडक सुरुवाती रूपमा दुई वर्षमा सम्पन्न गर्ने लक्ष्यसहित सुरु गरिएको यस सडक आयोजना अहिले स्थानीय जनताको पर्खाइ, पीडा र निराशाको पर्याय बनेको छ ।
सडक कालोपत्रे हुने आशामा उत्साहित भएका स्थानीय आज हिलो र धुलोको बीचमा ज्यान जोगाउँदै यात्रा गर्न बाध्य छन् । अर्नमा गाउँपालिका–३ का स्थानीय सिकेन्द्र यादवको भनाइमा, “पाँच वर्ष बित्दा पनि बाटो नबन्दा यहाँका नागरिक हिलोमा फसिरहेका छन्, बालबालिकाको विद्यालय जान असहज छ भने बिरामी अस्पताल लैजान मुस्किल पर्छ ।”
त्यसैगरी, स्थानीय जगेश्वर यादवले ठेकेदार कम्पनीले सडकको किनार मात्र खनेर दिएको गुनासो गर्दै भने, “बर्खामा हिलो र हिउँदमा धुलोले जीवन कष्टकर बनेको छ। विकासको आशामा बसेका हामी नागरिक अब हरेक चुनावपछि झुटा आश्वासनमात्र थाप्दै आएका छौँ ।”
सडक निर्माणको जिम्मा हुलाकी सडक निर्देशनालय, योजना कार्यालय जनकपुरले लिएको हो । आयोजनाको शिलान्यास २०७७ भदौमा तत्कालीन भौतिक पूर्वाधार तथा यातायातमन्त्री वसन्तकुमार नेम्वाङले गरेका थिए । निर्माण कार्य २०७९ फागुन २३ भित्र सम्पन्न गर्ने लक्ष्य थियो । तर लक्ष्यभन्दा दोब्बर समय बित्दा पनि कामको प्रगति अत्यन्त निराशाजनक छ ।
निर्देशनालयका प्रमुख कृष्णकुमार महतोका अनुसार, हालसम्म सडकको भौतिक प्रगति २८ प्रतिशत मात्र रहेको छ । उनले जानकारी दिँदै भने, “निर्माण कम्पनीलाई पुनः एक वर्षको अन्तिम म्याद थप्ने प्रक्रिया अघि बढाइएको छ। यदि यो पटक पनि निर्माण सम्पन्न भएन भने कारबाही प्रक्रिया अगाडि बढ्छ ।”
निर्देशनालयले ठेकेदार कम्पनीलाई दुईपटक म्याद थप गरिसकेको छ—पहिलोपटक २०८० फागुन २२ सम्म र दोस्रोपटक २०८१ फागुन २२ सम्म। तर अझैसम्म निर्माणको गति अत्यन्त सुस्त छ । सडकका केही स्थानमा मात्रै ग्राभेल हालिएको र केही नाला बनाइएको देखिन्छ ।
अर्नमा गाउँपालिकाका अध्यक्ष अशोक यादवले ठेकेदार कम्पनीसँग पटक–पटक सम्पर्क गर्ने प्रयास गरे पनि उनीहरू सम्पर्कमै नआएको आरोप लगाए । उनले भने, “निर्देशनालय र निर्माण कम्पनीको लापरबाहीका कारण सर्वसाधारणले वर्षौँदेखि यातना भोगिरहेका छन्। सडक निर्माणमा देखिएको लापरबाही राज्यप्रतिको अविश्वास बढाउने खालको छ ।”
निर्देशनालयका अनुसार, यो सडक निर्माणका लागि कुल रु ९१ करोड ३९ लाख ७९ हजार ६० को लागतमा ठेक्का दिइएको हो । हालसम्म भ्याटबाहेक रु २५ करोड ४९ लाख सात हजार ७१४ ठेकेदार कम्पनीलाई भुक्तानी भइसकेको छ। तर, काम भने अझै सुस्त गतिमा छ ।
यो विषयमा आफ्नो प्रतिक्रिया दिनुहोस् !