जनकपुरधाम, असार ३ गते । महोत्तरीको गौशाला नगरपालिकामा नगर प्रमुख र उपप्रमुखबीचको विवाद चरमोत्कर्षमा पुगेको छ ।
उपमेयर रेणुकुमारी महतोले नगर प्रमुख दिपेन्द्र महतो र प्रमुख प्रशासकीय अधिकृत केशव अधिकारीको मिलेमतोमा आफूलाई जबर्जस्ती कार्यालय प्रवेशमा रोक लगाइएको गम्भीर आरोप लगाएकी छन् ।
मंगलबार बिहानदेखि कार्यालय गेटमै उनलाई नगर प्रहरीले रोकेको भिडिओसमेत सार्वजनिक भएको छ । उपमेयर महतोका अनुसार, नगर कार्यपालिकाको बैठक बिहान ८ बजेका लागि तय गरिएको थियो । तर, उनी करिब साढे ८ बजे कार्यालय पुग्दा गेटमै रोकिनु परेको र कार्यालय समयमै पुनः जान खोज्दा समेत प्रवेश अनुमति नदिइएको बताइन् ।
उपमेयर महतोले सार्वजनिक गरेका भिडियोहरूमा उनी गेटबाहिर नगर प्रहरीसँग बाझिँदै देखिन्छिन् । उनले भनिन्, “गेटबाहिरै मलाई रोकिनु अन्याय हो । यो नांगो हस्तक्षेप हो । कार्यपालिकाको उपप्रमुख हुँदाहुँदै प्रवेशमै रोक लगाउनु अस्वीकार्य हो ।“ उनले जनसमक्ष सहयोगको आह्वान गर्दै, आफूले नगरवासीको हक र अधिकारका लागि लडिरहने दृढता व्यक्त गरिन् ।
उपमेयर महतोले नगरपालिकामा दर्ता चलानीको किताब नियाल्दा धेरै कोलम खाली रहेको र त्यसको कारणबारे छानबिन आवश्यक रहेको बताएकी छन् । “कोलम किन खाली छ? के यसमार्फत अनियमितता गरिएको हो?“ भन्ने प्रश्न उठाउँदै उनले हिजो मात्र रजिस्टर नियन्त्रणमा लिएको जानकारी दिएकी थिइन् । यतिबेला मेयर र प्रमुख प्रशासकीय अधिकृतबीचको मिलेमतोमा रजिस्ट्रेसन प्रक्रिया लुकाइएको उनको आरोप छ ।
सत्तारुढ जनता समाजवादी पार्टी (जसपा) बाट निर्वाचित मेयर दिपेन्द्र महतो र उपमेयर रेणुकुमारी महतोबीच पछिल्लो समय कार्यशैली र पारदर्शिता सम्बन्धी विषयमा तीव्र मतभेद देखिँदै आएको हो । उपमेयर महतोले एकपछि अर्को गरी नगर कार्यसम्पादनमा पारदर्शिता र जवाफदेहिता नदेखिएको भन्दै सार्वजनिक रूपमा आवाज उठाउँदै आएकी छन् ।
उपमेयरलाई रोकिएको विषयमा अहिले सम्म नगरप्रमुखको तर्फबाट कुनै पनि किसीमको प्रतिक्रिया आएको छैन । उनीहरूले कुनै आधिकारिक प्रतिक्रिया नदिएसम्म विषय एकपक्षीय देखिए तापनि भिडिओ प्रमाण र उपमेयरको भनाइले विषयलाई थप चर्काएको छ ।
यो विषयमा आफ्नो प्रतिक्रिया दिनुहोस् !