जनकपुरधाम, जेठ ७ गते । धनुषा र महाेतरी जिल्ला जाेड्ने दुधमति नदी संरक्षण र सौन्दर्यकरणका लागि उत्खन्न तथा विकास निर्माण कार्य अघि बढाउन गठन हुने विभिन्न समितिहरूका पदाधिकरीहरुको कार्यक्षेत्र र सेवा सुविधा सम्बन्धमा बनेकाे (TOR) सर्वसम्मतिले पारित गरिएको छ ।
दूधमति नदी उत्खन्न तथा विकास कार्य कार्यान्वय उपसमितिको बुधवार बसेको बैठकबाट उत्खन्न र विकास निर्माण कार्य व्यवस्थित रुपले अघि बढाउन उपसमितिका पदाधिकारीहरुले सर्वसम्मतबाट पारित गरेका हुन् ।
प्रदेश सरकारकाे गाैरवकाे आयाेजनाकाे रूपमा रहेका दुधमति नदीकाे संरक्षण एवं साैन्दर्यकरणका लागि कार्य अघि बढाउन गठन हुने भनिएको व्यवस्थापन समिति, प्रचार प्रसार समिति र प्राविधिक समूहका पदाधिकारीहरुको काम कर्तव्य, अधिकार र सेवा सुविधा सहित कर्मचारी नियुक्ति गर्ने बारे निर्णय गरियो ।
यसका साथै स्थापना गरिने कार्यालयका लागि आवश्यक पर्ने सामाग्री खरीद र दूधमति नदी तथा पोखरीमा डुङ्गा चलाउने निर्णय समेत गरिएको छ ।
यसअघिको बैठकमा दूधमति नदीको उत्खन्न र विकास निर्माण कार्य अघि बढाउन व्यवस्थापन समिति, प्राविधिक समूह र प्रचार प्रसार समिति गठन गर्ने र कार्यालय स्थापना गर्ने निर्णय गरिएको थियो । कार्य तिव्रगतिमा अघि बढाउन पहिलो चरणमा नदीको बहाव क्षेत्र छुटयाउन बोलपत्र आह्वान समेत भइसकेको छ ।
उपसमितिका संयोजक एवं ऊर्जा, सिचाई तथा खानेपानी मन्त्री शेष नारायण यादवको संयोजकत्वमा बसेको सो बैठकमा मन्त्रालयका निमित सचिव रामकुमार खंग, महाशाखाका प्रमुखहरु, उपसमितिमा आबद्ध सदस्यहरु धनुषा महोत्तरीस्थित जिल्ला प्रशासन कार्यालयका प्रतिनिधि, मालपोत तथा नापी कार्यालयका प्रतिनिधि, क्षिरेश्वर नगरपालिका र लक्ष्मिनिण गाउँपालिकाका जनप्रतिनिधिहरू, अभियन्ताहरूको उपस्थिति रहेको थियो ।
धार्मिक रुपले धनुषा र महोत्तरी जिल्ला जोड्ने कूल नदीकाे बहाव क्षेत्र रहेका दूधमति नदीको पहिलो चरणमा उद्गम स्थलदेखि साढे ६ किलोमीटरसम्म नापनक्सा गरेर जग्गा छुटयाई उत्खन्न कार्य अघि बढाइ सकिएकाे उपसमितिका संयोजक एवं मन्त्री शेषनारायण यादवले जानकारी दिएका छन् ।
परियोजना बारे जानकारी गराउंदै उनले भने करीब ५ अर्बको बहुवर्षिय परियोजना अन्तर्गत रहेको यस योजना अन्तर्गत दूधमतिको बहाउ क्षेत्र बाहेक दुवैतर्फ ११/११ मीटर कालेपत्र सडक, उद्गम स्थलमा मन्दिर तथा पार्कसहित पोखरीको सौन्दर्यकरण, नदी बहाउ क्षेत्रमा पर्ने प्रत्येक गाउँ/गाउँ नजिक दूधमति र सीता माताको मन्दिर सहित पार्क, प्रत्येक २/२ किलोमीटरको दूरीमा ड्यामको व्यवस्था गरिने याेजना रहेकाे छ ।
यो विषयमा आफ्नो प्रतिक्रिया दिनुहोस् !