जनकपुरधाम, वैशाख ३० गते । धनुषाको कमला नगरपालिका वडा नम्बर ५ लक्कर गाउँ नेपाली टोलका आगलागी पिडीत परिवारहरुलाई सामुदायिक परिवार कल्याण संघ (सिएफडब्लूए) ले राहत सामाग्री वितरण गरेका छन् ।
गएको वैशाख १७ गतेका दिन दिउंसो करीब अढाई बजे भएको भीषण आगलागी भएको थियो । सो आगलागीमा परेर ९ घरपरिवार धनजनको क्षति भएको थियो । सो आगलागीमा श्रवण सहनी, जितेन्द्र सहनी, दिलीप सहनी, राजकुमार सहनी, शम्भु सहनी, बिहारी सहनी, पुनी सहनी, सोनीलाल सहनी, फूलकुमारी सहनीको घर जलेर नष्ट भएको थियो ।
आगलागी पिडीत परिवारहरुलाई प्लान इन्टरनेसनल नेपालको आर्थिक सहयोगमा साझेदार संस्था सिएफडब्लूएद्वारा सञ्चालित स्पोन्सरसिप कम्युनिकेसन परियोजनाद्वारा अवलोकन गरी पिडीत परिवारहरुलाई सोमवार राहत वितरण गरिएको हो ।
सो आगलागीमा ९ घर परिवार पिडीत रहेकोमा ७ परिवारको घर पूर्ण रूपले क्षतिग्रस्त भएको छ भने २ परिवारको आंशिक क्षति भएको जसमध्ये ५ घरपरिवार परियोजनामा प्रत्यक्ष रूपमा आबद्ध प्रत्याभूत बालबालिका र उनको परिवार सहित ९ घरपरिवारलाई राहत वितरण गरिएको जनाइएको छ ।
कमला नगरपालिकाका मेयर विशेश्वर यादवको अध्यक्षता र सम्बन्धित वडा सदस्य, गाउँका समाजसेवी भरभलादमीको उपस्थितिमा प्रति घरपरिवार चामल २५ केजी, दाल ३ केजी, नून ३ केजी, खानेतेल ३ लिटर, मुरही एक केजी, चुरा २ केजी, सोयाबीन १ केजी, गेडागुडी २ केजी, विस्कुट २ प्याकेट, आलू १० केजी, प्याज ५ केजी, तन्ना, झुल र गमछा एक/एक थान वितरण गरिएको सिएफडब्लूएका स्पोन्सरसिप परियोजनाको प्रोग्राम अधिकृत आशा कुमारी मण्डलले जानकारी दिएकी छिन् ।
यो विषयमा आफ्नो प्रतिक्रिया दिनुहोस् !