जनकपुरधाम, १६ वैशाख । धनुषास्थित एभरेष्ट पेपर मिल्स प्रालि, जानकी मेडिकल कलेज र बुद्ध प्रारंगिक मल सहितका तीनवटा उद्योग एवं प्रतिष्ठानको बैंक खाता र चल अचल सम्पति रोक्का गरिएको छ ।
श्रमिक कर्मचारीकाे तलब भत्तासहितका सेवा सुविधा बक्याैता राखेकाे आरोपमा श्रम अदालतकाे आदेशानुसार श्रम तथा रोजगार कार्यालय जनकपुरधाममा ती उद्योग प्रतिष्ठानको बैंक खाता तथा चल अचल सम्पति रोक्का गरेको हो ।
मंगलबार धनुषाको लक्ष्मीनियामा आयोजित सञ्चारकर्मीहरूसँगको अन्तरक्रिया कार्यक्रममा कार्यालय प्रमुख दिवाकर भुजेलले यस्तो जानकारी दिएका हुन् ।
उनले भने श्रम विवाद त्रिपक्षीय छलफलमार्फत समाधान गरिएको, श्रम अदालतका फैसलाहरू कार्यान्वयन गर्न यस्तो गरिएको हो । कर्मचारी श्रमिकको बाँकी बक्यौता रकम फर्छौट नभएसम्म तिनीहरुले कर्मचारीको तलब भत्ता वितरण त्यो पनि श्रम कार्यालयको स्वीकृति मात्र गर्न पाउने आर्थिक कारोबार गर्न पाउँछ ।
हाल एभरेष्ट पेपर मिल्सकाे आर्थिकदेखि उत्पादनसम्म सम्पर्ण कार्य राेक्का भई बन्द अवस्थामा रहेकाे छ भने जानकी मेडिकल कलेज र बुद्ध प्रारंगिक मल उद्याेग चालू रहेकाे छ ।
श्रम तथा रोजगार कार्यालयमा श्रमिक कर्मचारीहरुले दिएको पारिश्रमिक नपाएको सम्बन्धी दिएको उजुरीको आधारमा श्रम अदालतको फैसला अनुसार तिनीहरुको बैंक खाता तथा चलअचल सम्पति रोक्का गरिएको हो । चालु आर्थिक वर्षमा ४६ वटा श्रम उजुरी सो कार्यालयमा परेको हो । जसमध्ये १५/१६ वटा त एभरेष्ट पेपर मिल्सकै रहेको भुजेलले जानकारी दिए ।
सो अन्तरक्रिया कार्यक्रममा चालु आर्थिक वर्षको हालसम्मको कार्य विवरण सार्वजनिक गर्दै पाँच जिल्लाबाट वैदेशिक रोजगारीका लागि जाने ३० हजार ६२ जनालाई श्रम स्वीकृति दिएको जानकारी दिइयो । कार्यक्रममा प्रमुख भुजेलले भने, ‘हामीले धनुषा, महोत्तरी, सर्लाही, सिरहा र सप्तरी जिल्लाका नागरिकहरूका लागि वैदेशिक रोजगारीसम्बन्धी सेवा प्रवाह गर्दै आएका छौं ।
कार्यालयले ११२ वटा उद्योग प्रतिष्ठानको निरीक्षण गरी श्रम ऐन कार्यान्वयनको स्थिति अनुगमन गरेको उनले बताए । साथै ११२ वटा बाल श्रम निरीक्षण, ११८ वटा श्रम अडिट र श्रमिक तथा रोजगारदाता लक्षित सचेतना तथा अभिमुखिकरण कार्यक्रमहरू सम्पन्न गरिएका छन् । कार्यालयबाट प्रदान गरिने सबै सेवा प्रणाली अनलाइन माध्यमबाट उपलब्ध गराइएको पनि जानकारी दिइयो ।
कार्यक्रम नेपाल पत्रकार महासंघ धनुषाका अध्यक्ष पुरन साहको अध्यक्षतामा सम्पन्न भएको थियो । अध्यक्ष साहले श्रम कार्यालयको पारदर्शिता, उत्तरदायित्व र सरोकारवालासँगको समन्वयलाई प्रशंसा गर्दै आगामी दिनमा श्रम क्षेत्रमा देखिएका चुनौतीहरू समाधान गर्न मिडिया र कार्यालयबीच सहकार्य आवश्यक रहेको बताए ।
यो विषयमा आफ्नो प्रतिक्रिया दिनुहोस् !