जनकपुरधाम, वैशाख ४ गते । पूर्व पश्चिम राजमार्ग अन्तर्गत धनुषा जिल्लाको लक्ष्मिनीया गाउँपालिकास्थित लक्ष्मिनिया बजारमा रहेका त्रिदेव अंग्रेजी आवासीय माध्यमिक विद्यालयले आफ्नो २५ औं स्थापना दिवस अर्थात रजत जयन्ती समारोह मनाएको छ ।
मधेशको ग्रामीण क्षेत्रमा विगत २५ वर्षदेखि गुणस्तरीय शिक्षाको उज्यालो फैलाउँदै आएका सो विद्यालयले सामाजिक उत्तरदायित्व पनि उत्तिकै प्रभावकारी रूपमा वहन गर्दै आएको कार्यक्रममा उपस्थित वक्ताहरूले बताएका छन् ।
समारोहका प्रमुख अतिथि पूर्वराजदूत प्रा.डा. रामस्वार्थ रायले विगत २५ वर्षदेखि ग्रामीण भेगमा त्रिदेव विद्यालयले अंग्रेजी माध्यमको शिक्षाबाट पुरयाउंदै आएको सेवा निकै सराहनीय रहेको भनी प्रशंसा व्यक्त गरे । उनले भने, ‘शिक्षा भनेको समाजको मेरुदण्ड हो । त्यसमा पनि अंग्रेजी शिक्षा अहिलेको आवश्यकता भएकाले त्यसलाई मजबुत बनाउने कार्य त्रिदेवले गरेकोमा निकै प्रशंसनीय कार्य हो ।
उनले अंग्रेजीसहित विज्ञान, प्रविधि र नैतिकताको समिश्रणमा आधारित शिक्षाको आवश्यकता औंल्याउँदै शिक्षामार्फत सामाजिक रूपान्तरण सम्भव हुने धारणा राखे ।
कार्यक्रमका विशिष्ट अतिथि तथा मधेश प्रदेश सभा सदस्य रामअशिष यादवले यस त्रिदेव विद्यालयले गुणस्तरीय शिक्षासँगै संस्कार, संस्कृति र सामाजिक भावनाको संरक्षणमा पनि योगदान पु¥याएको भनी प्रशंसा गरे । उनले भने ‘आजका विद्यार्थी भोलिका नेता, वैज्ञानिक र समाजसेवी हुन् । त्यसकारण विद्यालयको दायित्व अझ ठूलो रहेकोमा त्रिदेवले पुरयाउंदै आएको सेवा देश निर्माणका लागि महत्वपूर्ण योगदान हो ।’
कार्यक्रममा प्याब्सनका केन्द्रीय तथा जिल्ला पदाधिकारीहरूको उपस्थिति रहेको थियो । उनीहरूले त्रिदेव विद्यालयले विगत २५ वर्षमा आधुनिक शिक्षण पद्धति आत्मसात गर्दै आफूलाई ग्रामीण शिक्षा क्षेत्रमा सफलतापूर्वक स्थापित गरेको उल्लेख गरे ।
लक्ष्मिनीया गाउँपालिकाका अध्यक्ष भोगेन्द्र झाले विद्यालयले गाउँपालिकाको शैक्षिक विकासमा खेलेको भूमिकाको प्रशंसा गर्दै भविष्यमा पालिकाले विद्यालयसँग सहकार्य गर्ने प्रतिबद्धता व्यक्त गरे ।
कार्यक्रममा कबिर बाल आश्रमका सञ्चालक सन्त आलोकलाई विद्यालय परिवारद्वारा सम्मान गरिएको थियो। साथै, बाल आश्रमका बालबालिकालाई खाद्यान्न तथा शैक्षिक सामग्री (कापी–कलम) प्रदान गरिएको थियो ।
विद्यालयका संस्थापक अध्यक्ष ब्रम्हदेव यादवको अध्यक्षतामा सम्पन्न समारोहमा प्रिन्सिपल एवं संचालक नवल यादवले सबै अतिथि, अभिभावक र शिक्षकहरूलाई स्वागत गर्दै विद्यालयलाई अझ प्रगतिशील बनाउने प्रतिबद्धता जनाए ।
यो विषयमा आफ्नो प्रतिक्रिया दिनुहोस् !