जनकपुरधाम, वैशाख ३ गते । जनकपुर–ढल्केवर सडक खण्ड अन्तर्गत पर्ने मिथिला नगरपालिका–२ र ६ को सीमामा पर्ने बसही खोलाको अधूरो पुल निर्माण गर्नुपर्ने माग गर्दै स्थानीयवासीले चक्काजाम गरेको छ ।
राजु कन्ट्रक्सन कम्पनीले वर्षौंदेखि पुल निर्माणको जिम्मा लिएर बेवास्ता गरेपछि जनजीवन हैरान बनेको छ । नियमितरूपमा सवारी दुर्घटना भइरहने यो खतरनाक ठाउँमा दर्जनौँले ज्यान गुमाइसकेका छन् । यस्तै घटना दोहोरिन नदिन माग गर्दै स्थानीय जनप्रतिनिधि, सर्वसाधारण, युवा तथा विद्यार्थीहरूको सहभागितामा बुधवार बिहान ढल्केवरमा एक घण्टा चक्काजाम गरिएको थियो ।
मिथिला नगरपालिका–६ का वडाध्यक्ष नन्दकिशोर यादवले पुल निर्माण अलपत्र पार्नु जनताको जीवनसँग खेलवाड भएको टिप्पणी गर्दै चेतावनी स्वरूप चक्काजाम गरिएको बताए । ‘हामीले धेरै सह्यौं, अब धैर्यको सीमा नाघेको छ,’ उनले भने, ‘आज प्रमुख जिल्ला अधिकारीसँग छलफल हुँदैछ । यदि तत्काल काम सुरु भएन भने जनस्तरबाट संघर्ष चर्काउनेछौं ।’
बसही खोलाको यो पुल वर्षाैदेखि अधुरो अवस्थामा छ । खासगरी रातको समयमा झन् बढी दुर्घटना हुने गरेको स्थानीयको गुनासो छ । ‘तपाईं एकपल्ट त्यहाँ मोटरसाइकल लिएर जानुहोस्, बाँच्नुभयो भने भाग्यमानी ठहरिनुहुन्छ,’ आन्दोलनमा सहभागी एक युवाले भने ।
स्थानीयका अनुसार पुल नहुँदा यातायातका साधन खोलाको पेटीबाट जोखिम मोलेर गुड्न बाध्य छन् । भारी सवारी साधनका लागि त यो मार्ग बन्दजस्तै भएको छ । विद्यालय जाने बालबालिका, बुढापाकालगायत हरेक वर्गलाई दिनहुँ सास्ती खेप्नुपरेको छ ।
पुल निर्माणको जिम्मा लिएको राजु कन्ट्रक्सन कम्पनीमाथि जनप्रतिनिधिले ठेक्का लिएर काम नगर्ने, निर्माणस्थलमा सामाग्री राखेर छोड्ने अनि वर्षाैसम्म सम्पर्कविहीन रहने आरोप लगाएका छन् । ‘ठेकेदार कम्पनीको नियत नै शंका लाग्दो छ,’ वडा अध्यक्ष यादवले भने, ‘यस्ता लापरबाही कम्पनीलाई कालोसूचीमा राख्नुपर्छ ।’
चक्काजामको जानकारीपछि जिल्ला प्रहरी कार्यालय र प्रशासनका अधिकारी स्थलमै पुगेर वार्ताको पहल थालेका छन् । प्रमुख जिल्ला अधिकारीसँग आजै छलफल हुने र जनप्रतिनिधिहरूले अल्टिमेटम दिने तयारी गरेका छन् । यदि वार्ता निष्फल भयो भने स्थानीयले सडकमै आमसभा, धर्ना र मसाल जुलुस जस्ता आन्दोलनका कार्यक्रम घोषणा गर्ने चेतावनी दिएका छन् ।
यो विषयमा आफ्नो प्रतिक्रिया दिनुहोस् !