जनकपुरधाम, माघ २९ गते । नेपाल भ्रष्टाचार सूचकाङ्कमा अघिल्लो वर्षको तुलनामा एक स्थान उक्लेको छ । ट्रान्सपरेन्सी इन्टरनेशनलले सार्वजनिक गरेको भ्रष्टाचार बोध सूचकाङ्क २०२४ अनुसार नेपालले १०० मा ३४ अंक प्राप्त गर्दै १०७ औं स्थान हासिल गरेको छ भने अघिल्लो वर्ष नेपाल १०८ औं स्थानमा थियो ।
ट्रान्सपरेन्सी इन्टरनेशनल नेपालले मंगलबार सार्वजनिक गरेको प्रतिवेदन अनुसार, नेपालमा भ्रष्टाचार नियन्त्रणका प्रयास भए पनि सुधारको गति अपेक्षाकृत रूपमा सुस्त रहेको देखिएको छ ।
भ्रष्टाचार प्रमुख समस्या रहँदा शासन व्यवस्था कमजोर बन्ने खतरा रहेको ट्रान्सपरेन्सी नेपालका महासचिव डा. सागरराज शर्माले बताए । उनले नेपालमा सार्वजनिक सेवा प्रवाहमा पारदर्शिता कायम गर्न र सुशासन प्रवद्र्धन गर्न अझ प्रभावकारी नीति तथा संयन्त्र आवश्यक रहेको उल्लेख गरे ।
ट्रान्सपरेन्सी इन्टरनेशनलको प्रतिवेदन अनुसार, नेपाल अझै पनि धेरै भ्रष्टाचार हुने मुलुकहरूमा गणना हुन्छ । १८० देश समेटिएको सूचीमा नेपाल दक्षिण एसियाली मुलुकहरूमध्ये मध्यम श्रेणीमा पर्छ । सन् २०२४ को सूचकाङ्कमा भारत ९३औं स्थानमा, पाकिस्तान १४०औं स्थानमा, बंगलादेश ১৪৯औं स्थानमा, माल्दिभ्स ७७ औं स्थानमा, भूटान २५ औं स्थानमा र श्रीलंका ११४औं स्थानमा रहेका छन् ।
भ्रष्टाचार नियन्त्रणका लागि नेपालले ऐन तथा कानुनी संरचना तयार पारे पनि कार्यान्वयन तहमा कमजोरी रहेको विज्ञहरू बताउँछन् । राजनीतिक अस्थिरता, कमजोर प्रशासनिक प्रणाली, प्रभावकारी अनुगमन अभाव तथा राजनीतिक हस्तक्षेपका कारण सुशासन कायम गर्न चुनौती थपिएको छ । नेपालले अघिल्लो वर्षको तुलनामा एक स्थान सुधार गरे पनि समग्रमा भ्रष्टाचार नियन्त्रणमा ठोस उपलब्धि हासिल गर्न अझै धेरै मेहनत आवश्यक रहेको विज्ञहरूको धारणा छ ।
यो विषयमा आफ्नो प्रतिक्रिया दिनुहोस् !