जनकपुरधाम, माघ २९ गते । मेयर गर्दै आएको लापरवाहीका कारण धनुषाको हंसपुर नगरपालिकास्थित सामुदायिक बिद्यालयहरुको अवस्था निकै दयनीय बनेकाे छ ।
नगरपालिकाका मेयर प्रदीप यादवको लापरवाहीका कारण त्यहाँको शैक्षिक अवस्था दिनदिनै ध्वस्त बन्दै गएकाे आराेप लगाउंदै शिक्षकहरु आन्दोलनमा उत्रने चेतावनी दिएको छ ।
मेयरको अदुर दृष्टिका कारण नगरपालिका भित्रका सम्पूर्ण बिद्यालयको अवस्था दयनीय बन्दै गैरहेको भन्दै पालिका स्थित विद्यालयका प्रधानाध्यापकहरुले प्रमुख प्रशासकीय अधिकृत सर्वजीत झालाई ज्ञापन पत्र बुझाएको छ ।
उनीहरुले तीन दिने अल्टिमेटमसहित शैक्षिक अवस्था सुधारका लागि ७ बुँदे माग सहितको ज्ञापनपत्र संयुक्त रूपमा बुझाएका हुन ।
प्रधानाध्यापकहरुले सुरक्षित एवं भय रहित वातावरण कायम गर्नुपर्ने, श्री तपसी बाबा मावि टील्हिको समस्या समाधान हुनुपर्ने, गैर कानूनी सरुवा फिर्ता गर्नुपर्ने, प्रधानाध्यापकमाथि भएको दुर्व्यवाहरमा संलग्नलाई कारवाही हुनुपर्ने, रोक्का राखिएको दिवाखाजा लगायत अन्य शीर्षकमा अविलम्ब निकासा हुनुपर्ने, वर्षौदेखी बिद्यालयको खातामा रोक्का राखिएका रकमहरु फुकुवा गर्नुपर्ने र शिक्षक तथा प्रअहरुको समस्या तत्काल समाधान हुनुपर्ने माग अघि सारेका छन् ।
तीन दिनभित्र माग पुरा नभए आन्दोलनमा जाने चेतावनी समेत उनीहरुले दिएका छन् । फागुन १ गतेसम्म माग पुरा नभए २ गतेदेखि नगरपालिका कार्यालयमा धर्ना र ४ गतेदेखि अनिश्चिकालिन विद्यालय बन्द गरी पठनपाठन बन्द गर्ने लगायतका आन्दोलन तिनीहरुले गर्ने चेतावनी ज्ञापन पत्र मार्फत दिएका छन् ।
यता नगरपालिकाका पूर्व मेयर रामज्ञान मण्डलले मेयर यादव शिक्षाप्रति गम्भीर नरहेकाे यहांकाे शिक्षा खस्किदै गएकाे हाे । पैसा लिएर सरूवा,बढुवा गर्ने, मेयरले आफ्ना कुरा नमान्ने प्रअकाे विद्यालयका रकम राेक्का र शिक्षकहरूलाई दुर्व्यवहार गर्ने लगायतकाे कार्य गरि यहांकाे शिक्षा बन्धक बनाएर राखेकाे आराेप लगाए ।
उनले विद्यालयका विद्यार्थीहरू खाजा रकम र अन्य आवश्यक रकम अविलम्ब निकासा गर्न मांग गर्दै प्रअहरूकाे आन्दाेलनमा ऐक्यबद्धता जनाएका छन ।
यो विषयमा आफ्नो प्रतिक्रिया दिनुहोस् !