जनकपुरधाम, माघ १९ गते । नयां उद्यमीहरूलाई प्रशिक्षित एवं मार्ग निर्देशन गर्न जनकपुरधाममा स्कुल अफ सोशियल इन्टरप्रेनरसिप (एसएसई सर्टिफिकेट कोर्स) शुरू गरिएकाे छ ।
नबिल बैंक लिमिटेड र जनकपुरधामस्थित मोनाष्टिक आवासीय माध्यमिक विद्यालयद्वारा स्कुल अफ सोशियल इन्टरप्रेनरसिप (एसएसई सर्टिफिकेट कोर्स) कार्यक्रम संचालनमा आएको छ ।
सो कार्यक्रमको औपचारिक शुरुवात शनिबार सह आयोजकको रुपमा रहेका मोनाष्टिक आवासिय माध्यमिक विद्यालयमै गरिएको हो । नबिल बैंक र मोनाष्टिक विद्यालयको सहकार्यमा सञ्चालन भएको सो कार्यक्रमका लागि २५ छनौट गरिएको छ ।
सहभागीहरू मध्ये ३ जनाले मिथिला कला, आर्ट ग्यालरी र सिक्की कार्य जस्ता क्षेत्रमा योगदान पुर्याएका छन् भने अन्य ५ जनाले होलसेल व्यापार, अचार उत्पादन, इलेक्ट्रोनिक सेवा, गद्दा उत्पादन र अनलाइन व्यवसाय सञ्चालन गरिरहेका छन् ।
यस कार्यक्रममा सहभागी हुनेहरू जनकपुरधाम, मिथिला बिहारी नगरपालिका र जनकपुरधाम–९ पिडारी चोकका विभिन्न क्षेत्रका उद्यमी हुन् । यस कार्यक्रमले सामाजिक उद्यमशिलतामा रुचि राख्ने नयाँ उद्यमीहरूलाई आवश्यक ज्ञान र मार्गनिर्देशन प्रदान गर्दै उनीहरूलाई आत्मनिर्भर बनाउने लक्ष्य राखेको छ । तीन महिनाको अवधिमा सहभागीहरूलाई १४ दिनको एक्सन बेस्ड तालिम दिइनेछ ।
तालिममा ब्रान्डिङ, मार्केटिङ, उद्यमशिलताको विविध पक्षमा प्रशिक्षण हुनेछ । साथै, अनुभवी उद्यमी र प्रशिक्षकहरूसँगको अनुभव आदानप्रदान, कार्यशाला र फिल्ड भिजिट कार्यक्रम पनि समावेश गरिएको छ ।
कार्यक्रमको सम्बोधन गर्दै मधेश प्रदेशका मुख्यमन्त्री सतिश कुमार सिंह, नेपाल राष्ट्र बैंकका निर्देशक डिल्लीराम सुवेदी, नबिल बैंकका अध्यक्ष उपेन्द्र प्रसाद पौडेल, उद्योग वाणिज्य संघ जनकपुरधामका अध्यक्ष सुरेन्द्र भण्डारी, मोनाष्टिक विद्यालयका प्रबन्ध निर्देशक डा. सोनु कुमार साहलगायतकाहरुले उद्यमशिलताको महत्त्वमा जोड दिए ।
नबिल बैंकले यस किसिमको कार्यक्रमबाट हालसम्म ८६६ जनालाई सहभागी गराइसकेको छ । जसमध्ये ५९९ जनाले कोर्स पूरा गरिसकेका छन् । बैंकले सामाजिक उत्तरदायित्वअन्तर्गत सामाजिक उद्यमशिलता प्रवद्र्धन गर्न देशभरका सात प्रदेशका ११ वटा शैक्षिक संस्थासँग सहकार्य गर्दै सर्टिफिकेट कोर्स र फेलोसिप कार्यक्रम सञ्चालन गर्दै आएको छ ।
यो विषयमा आफ्नो प्रतिक्रिया दिनुहोस् !