जनकपुरधाम, माघ १२ गते । मधेश प्रदेश सरकारका उर्जा, सिचाई तथा खानेपानी मन्त्री शेष नारायण यादवले
धनुषाको धनुषाधाम नगरपालिका ९ स्थित मुर्गिया खोलामा चाँडै नै ड्याम निर्माण गरिने प्रतिबद्धता जनाएका छन् ।
शनिवार मधेस प्रदेशका सभामुख रामचन्द्र मण्डलसँगै खोलाको स्थलगत अनुगमनको क्रममा मन्त्री यादवले यस्तो प्रतिबद्धता जनाएकाे हाे । उक्त अनुगमनमा नगरपालिकाका मेयर बालेश्वर मण्डलको समेत उपस्थिति रहेको थियो ।
मन्त्री शेषनारायण यादवले हालका लागि ८० लाख रुपैयाँ बजेट छुट्याइएको जानकारी दिदैं यो बजेट पर्याप्त नभए पनि यसलाई बहुवर्षीय योजना बनाएर छिटो अघि बढाउनेछौं बताए । सभामुख रामचन्द्र मण्डलले ड्याम निर्माणपछि खानेपानी र सिंचाइको समस्या समाधान हुने र उत्तरी क्षेत्र हरियाली बनाउने बताए ।
मेयर बालेश्वर मण्डलले नगरपालिकाको सहयोगमा जेसीबी प्रयोग गरी बाँध निर्माणको काम सुरु भइसकेको बताए । उनले सभामुख र मन्त्रीको सहभागिताले यस योजनालाई बहुवर्षीय रूपमा अघि बढाउन विश्वास व्यक्त गरे ।
स्थलगत निरिक्षणको क्रममा नगर उपप्रमुख विद्या देवी भुजेल, वडा नं. ९ का अध्यक्ष सुरज लामा, वडा नं. २ की लक्ष्मी साह, वडा नं. ८ का कपिलबहादुर बस्नेत, वडा नं. ६ का ऋषि लामा, राजनीतिक दलका नेता, कार्यकर्ता, र स्थानीय बुद्धिजीवीहरूको उल्लेखनीय उपस्थिति रहेको थियो ।
यो विषयमा आफ्नो प्रतिक्रिया दिनुहोस् !