जनकपुरधाम, पुस ९ गते । धनुषा र महोत्तरी क्षेत्रमा पर्ने ऐतिहासिक तथा धार्मिक महत्व बोकेको दूधमति नदीको संरक्षण, जिर्णोद्धार र सौन्दर्यकरणका लागि आगामी आइतवारदेखि सीमांकनको काम शुरु हुने गरिने छ ।
मधेश प्रदेश सरकारको गौरवको आयोजनाका रुपमा रहेको दूधमति संरक्षण तथा सौन्दर्यकरण कार्यक्रम अन्तर्गत दुधमति नदी संरक्षण उच्चस्तरीय उपसमितिको मंगलवार बसेको बैठकबाट नदी क्षेत्रको जग्गा छुटाउन सीमांकन गर्ने निर्णय गरिएको हो ।
उपसमितिका अध्यक्ष उर्जा, सिचाई तथा खानेपानी मन्त्री शेषनारायण यादवको अध्यक्षतामा बसेको उपसमितिको बैठकबाट दूधमति नदीको बहाव क्षेत्र संरक्षणका लागि स्थलगत सीमांकनका लागि नापजाँच गर्नेसहितका अन्य ६ बुँदे निर्णय गरिएको छ ।
कूल ४६ किलोमीटरको दूरीमा रहेका सो नदीको अधिकांश क्षेत्र अतिक्रमणको चपेटामा परेको छ भने धनुषामा पर्ने भागको ६/७ किलोमीटर जति क्षेत्र माटो बालुवाले पुरिएर खेत नै बनिसकेको छ । यो नापजाँचले नदी पर्ने क्षेत्र संरक्षित हुनुका साथै उत्खन्न गर्न सहज हुने उद्देश्यले नाक्सांकन तथा रेखांकनको गर्ने निर्णय गरिएको उपसमितिका अध्यक्ष मन्त्री यादवले बताएका छन् ।
मंसिर १४ गतेदेखि शूरु हुने नक्सांकन अर्थात नदी क्षेत्र नापजाँचको कामको अवधि ३ महिना दिइएको छ । दूधमति नदीको उद्गम स्थल क्षिरेश्वरनाथ नगरपालिका वडा नम्बर ५ अरजनवादेखि महोत्तरीको मझौरा विसनपुर सीमावर्ती क्षेत्रसम्म गरिनेछ ।
दूधमति नदीको संरक्षण र सौन्दर्यकरण प्रदेश सरकारको गौरवको आयोजना रहेकाले आयोजना सम्पन्नपछि सो क्षेत्रमा पर्यटकीय र आर्थिक विकास सँगै कृषि क्षेत्रमा समेत सिचाईका लागि ठूलो मद्दत पुग्ने मन्त्री यादवले भने ।
सौन्दर्यकरण अन्तर्गत पर्यटकीय विकासका लागि उद्गमस्थलमा कामधेनु सहित माता दूधमतिको मन्दिर र पार्क निर्माण, नदीको डिलमा वृक्षारोपण, नदीको दुवैपट्टि सडक निर्माण, ठाउँ ठाउँमा पार्क निर्माण लगायतका कार्य गरिने मन्त्री यादवले जानकारी दिएका छन् ।
यी बाहेक उर्जा, सिचाई तथा खानेपानी मन्त्रालयद्वारा विस्तृत अध्ययन प्रतिवेदन (डिपीआर) तयार पारिने, बजेटको व्यवस्थापन सम्बन्धित मन्त्रालयले गर्ने, डिपीआरपछि टेण्डर प्रक्रिया अघि बढाइने, चालू आर्थिक वर्षमा छुटयाइएको रकमबाट तत्काल कार्य अघि बढाइने र प्रचार प्रसार समिति गठन गर्ने सहितका निर्णय समेत गरिएको छ ।
सो बैठकमा उपसमितिका पदाधिकरी, धनुषा र महोत्तरी जिल्ला प्रशासन कार्यालयका प्रतिनिधि, नापी तथा मालपोत कार्यालयका प्रतिनिधिसहित सरोकारवाला निकायका प्रतिनिधि, प्रहरी प्रशासन समेतको उपस्थिति रहेको थियो ।
माता सीतालाई दूध खुवाउन कामधेनु गाई धरतीमा आएको र तिनले आफ्नो स्तनबाट दूधको धारा बहाएपछि यो नदी बनेको धार्मिक मान्यता रहेको छ । दूधमती नदीको पानी केही वर्ष अगाडी सम्म दूधजस्तै बग्ने गथ्र्यो । तर नदीमै नाला र फोहोर मैला हरु फालिएपछि यो नदी संरक्षणको पर्खाईमा रहेको थियो । दूधमती नदी मिथिलाञ्चलकै सबैभन्दा पुरानो नदीहरु मध्ये एक हो । यो नदीलाई हिन्दूधर्मावलम्बीहरुले पवित्र मान्दै स्नान गर्ने, देवकार्य, पितृकार्य गर्ने महत्वपूर्णस्थलका रूपमा प्रयोग गर्दै आएका छन् ।
यो विषयमा आफ्नो प्रतिक्रिया दिनुहोस् !