जनकपुरधाम, मंसिर १८ गते । जनकपुरधाममा हुने श्रीरामजानकी विवाह महोत्सवमा सहभागी हुन भारतको अयोध्याबाट आएका आएका जन्तीलाई मटिहानी नगरपालिकाले भव्य स्वागत गरेका छन् ।
मटिहानीका मेयर हरिप्रसाद मण्डलसहितका जनप्रतिनिधि, जिल्लाका प्रमुख जिल्ला अधिकारी लालबाबु कवारी र नेपाली सेना, नेपाल प्रहरी र सशस्त्र प्रहरीका जिल्लास्थित प्रमुखहरूसहित मटिहानी नगरवासीले भगवान श्रीरामको नगर अयोध्यबाट आएका जन्तीको स्वागत गरेका हुन् ।
मटिहानीस्थित लक्ष्मीनारायण मठका मानमहन्थ, सामाजिक सङ्घसंस्थाका अगुवा, मटिहानीस्थित याज्ञवल्क्य लक्ष्मीनारायण विद्यापिठका आचार्य र राजकीय संस्कृत माध्यमिक विद्यालय (मटिहानी गुरुकूल)का शिक्षक, वटुकहरू र महोत्तरी उद्योग वाणिज्य सङ्घका पदाधिकारीहरु समेत सो स्वागत समारोहमा सहभागी भएका थिए ।
यसवर्ष श्रीरामजानकी विवाहोत्सवमा सहभागी हुन अयोध्यास्थित श्रीराम ट्रष्टका उच्च पदाधिकारी र साधुसन्तसहितको पाँच सयभन्दा बढीको संख्यामा जन्ती टोली मटिहानी आइपुगेको हो । सप्ताहव्यापी विवाह महोत्सवमा प्रत्येक पाँचौँ वर्ष अयोध्याबाट जन्ती सजिएर मटिहानीको बाट हुँदै जनकपुरधाम आउने परम्परा रहेको छ ।
नेपाल प्रवेश गरेपछि मटिहानी पहिलो दिनको रात्रिविश्राम गरेर जनकपुरधाम प्रस्थान गर्ने परम्परा अनुसार नै जन्ती सोमबार राति नै मटिहानी आइपुगेका हुन् । मटिहानी भगवान राम–सीताको विवाहमा वेदी बनाउन माटो खनिएको ठाउँका रुपमा परिचित रहेको छ ।
अयोध्याबाट आएका जन्तीलाई स्वागत सहित मिथिला भोजन (दालभात, सब्जी, चटनी, पापरतिलौरी, तरुवा र दही) गराइएको नगरप्रमुख मण्डलले बताए । सोमबार रात्रिविश्राम मटिहानीमा गरेका जन्ती मंगलवार बिहान जलेश्वर, पिपरा हुँदै जनकपुरधाम जाने जनाइएको छ ।
आज मटिहानीबाट जन्ती जलेश्वर जानेछन् । जलेश्वर नगरवासीको स्वागत ग्रहण गरी जलेश्वरनाथ महादेवको दर्शन गरेर जन्तीलाई आज महोत्तरीकै पिपरामा दिवाभोजन गर्ने तालिका छ । मटिहानीजस्तै जलेश्वर नगरपालिका र पिपरा गाउँपालिकाले पनि जन्तीको स्वागत तयारी गरेका छन् ।
विवाह पञ्चमीको सप्ताहव्यापी कार्यक्रम अन्तर्गत पहिलो दिन फुलवारी लिला, दोश्रो दिन नगर दर्शन सम्पन्न भइसकेको छ भने तेस्रो दिन धनुषयज्ञ, चौथो दिन तिलकोत्सव (दुलहीका पिताबाट वरपूजन र वस्त्रआभूषण प्रदान गरिने विधि), पाँचौँ दिन मटकोर (विवाहका लागि यज्ञवेदी बनाइने र कूल देवीदेवताको पूजा गर्ने विधि), छैटौँ दिन शुभविवाह र अन्तिम अर्थात् सातौँ दिन रामकलेवा विधिका कार्यक्रम सम्पन्न गरिनेछन् ।
यो विषयमा आफ्नो प्रतिक्रिया दिनुहोस् !