जनकपुरधाम, मंसिर १४ गते । धनुषाको जनकनन्दिनी गाउँपालिका ५ उधा टोलकी रेखाकुमारी मण्डलको हत्या आराेपमा उनका प्रेमीसहित ३ जना पक्राउ परेका छन् ।
पक्राउ परेका सबैलाई जिल्ला प्रहरी कार्यालय धनुषाले शुक्रवार सार्वजनिक गरेको छ ।
पक्राउ पर्नेहरूमा रेखाका प्रेमी जिल्लाकाे जनकनन्दिनी गाउँपालिका वडा नं. ३ बस्ने वर्ष २२ को राम ललित खत्वे मण्डलसहित खजुरी बस्ने वर्ष २० को ज्ञानेन्द्र दास र ऐ. शहीदनगर नगरपालिका वडा नं.८ नाथपट्टी बस्ने वर्ष २४ को रमेशकुमार मण्डल रहेका छन् ।
गएकाे मंसिर ८ गते जिल्ला धनुषा जनकनन्दिनी गाउँपालिका वडा नं.४ खजुरी र कमला नगरपालिका वडा नं.२ सरावेको बीच सीमानामा रहेको आमा खोलामा रेखाकाे शव प्लाष्टिकको बोराभित्र रहेको वेवारीसे अवस्थामा फेला परेको थियो ।
मृतक रेखाको अनुहारको बायाँतर्फ गालामा चोट लागेको, घाँटी काटीएको अवस्थामा रहेकोमा उक्त शवको प्रारम्भिक अनुसन्धान लासजाँच मुचुल्का गरी पो.मा.को लागि प्रादेशिक अस्पताल जनकपुरधाम धनुषा पठाइएको धनुषा प्रहरीका प्रहरी उपरीक्षक भूवनेश्वर तिवारीले बताए ।
घटनाको सूक्ष्म अनुसार गरी फरार रहेको अवस्थामा आरोपितहरुलाई पक्राउ गरी सार्वजनिक गरिएको र थप अनुसन्धान इप्रका खुजरीमै हुने त्यहाँका प्रमुख जिवन कुँवरले जानकारी दिएका छन् ।
उनले जनाए अनुसार मृतकलाई घटनास्थलमा ल्याउन ज्ञानेन्द्र दास र रमेशकुमार मण्डलले सहयोग गरेको र राम ललित मण्डल खत्वेले ढुंगाले अनुहारमा प्रहार गरी मुर्छित बनाई दाह्री काट्ने छुरा ब्लेडले घाँटी रेटी हत्या गरेर फरार भएको थियो ।
मृतक रेखाको विवाह गर्ने, सँगै बस्ने सम्बन्धमा विवाद हुँदा घटना भएको देखिएको बताए । मृतक रेखाकुमारी मण्डलको करिब ५/६ वर्ष अगाडीदेखि रामललित मण्डल खत्वेसँग प्रेम सम्बन्ध रहेको छानबीन खुलेको जानकारी दिए ।
रेखाको घर परिवारको मानिसहरूले उक्त सम्बन्ध स्वीकार नगरेको हुँदा उनी आफ्नो घरबाट भागी रामललित मण्डल खत्वेलाई विवाह गर्न दबाब दिएपछि उनले नेपाली सेनामा फर्म भरेको हुँदा जागिर खाई सकेपश्चात मात्र विवाह गर्ने भनेकोमा सोही विषयमा विवाद हुँदा घटना भएको जानकारी अनुसन्धानमा देखिएकाे एसपी तिवारीले बताए ।
यो विषयमा आफ्नो प्रतिक्रिया दिनुहोस् !