जनकपुरधाम, मंसिर २ गते । मंसिर १६ गते हुने उपनिर्वाचनका लागि धनुषाधाम वडा नम्बर १ मा रिक्त रहेका वडाध्यक्षमा विभिन्न राजनीतिक र स्वतन्त्र गरी २१ जनाले उम्मेदवारी दर्ता गराएका छन् ।
मुख्यनिर्वाचन अधिकृत निर्वाचन कार्यालय कार्यालयका अनुसार २ महिला र १९ पुरुष गरी २१ ज्नाले उम्मेदवारी दर्ता गराएको हो । बिहान १० बजेदेखि बेलुका ५ बजेसम्ममा १२ राजनीतिक दर ९ जना स्वतन्त्रले उम्मेदवारी दिएका हुन् ।
तत्कालिन वडा अध्यक्ष विश्वनाथ यादव क्यान्सर रोगले ग्रस्त भएर मृत्यु भएपछि बाँकी कार्यकालका लागि रिक्त रहेको पदमा उपनिर्वाचन हुन लागेको हो । तात्कालिन वडा अध्यक्ष नेपाली कांग्रेसको रेको कारण सो वडा जित्न कांग्रेसका केन्द्रदेखि स्थानीय तहसम्मका नेताहरुले जीतोड मेहनत गरिरहेका छन् ।
कांग्रेसबाट अशोक कुमार मण्डलले उम्मेदवारी दर्ता गराएका हुन । मण्डल कांग्रेसका भातृ संगठन नेवि संघका केन्द्रिय सदस्य हुन । दोश्रो कार्यकालसम्म कांग्रेसकै कब्जामा उक्त वडा रहेका कारण मण्डललाई जिताउन कांग्रेसले सम्पूर्ण शक्ति लगाइसकेका छन् ।
कांग्रेसले आफ्नो सम्पूर्ण शक्ति लगाएको कुरा उम्मेदवारी दर्ताको बेला गरिएको नगर प्रदर्शनले देखिन्छ । सो नगर प्रदर्शनमा कांग्रेस केन्द्रिय नेता राष्ट्रिय सभा सदस्य आनन्द प्रसाद ढुँगाना, मधेश सरकारका उर्जा, सिचाई तथा खानेपानी मन्त्री शेषनारायण यादव, पूर्व भौतिक पूर्वाधार विकास मन्त्री रामसरोज यादव, धनुषाधाम, हंसपुर, गणेशमान चारनाथ सहितका नगरपालिकाका मेयर लगायत दर्जनौ केन्द्रिय तथा स्थानीय नेताहरुको सहभागिताले देखिएको छ । सो क्षेत्र कांग्रेस केन्द्रिय नेता ढुँगाना र मेयर बालेश्वर मण्डलको गृह वडा पनि रहेको कारण कांग्रेसका लागि सो वडा इज्जतकै सवाल बनेको छ ।
यस्तै एमालेबाट प्रमोद यादव र माओवादीबाट सुनिल कापर केवटले उम्मेदवारी दिएका छन् । यसैगरी जसपा नेपालका अजय कुमार यादव, जसपाका अरुण सादा, जनमतका कुशेश्वर मण्डल, नेकपा एसका गोपाली साहु, बहुजन एकता पार्टीका प्रमिला कुमार सदा, राप्रपा नेपालका फौदार सदा मुसहर, राप्रपाका रामदेव सिंह दनुवार, रास्वपाका रामनरेश दास, राजपा नेपालका लक्ष्मिनिया देवीले पनि उम्मेदवारी दिएका छन् ।
त्यस्तै स्वतन्त्रबाट दिलिप कुमार ठाकुर बरही, नरेश सदा, रंजित कुमार यादव, रविकुमार मण्डल, विनोद कुमार यादव, विनोद मण्डल, विशेश्वर मण्डल, संजय कुमार यादव र हुकुम सिंहले उम्मेदवारी दिएका छन् । स्वतन्त्र मध्ये अधिकांश प्रमुख दलका डमी उम्मेदवार रहेको बुझिएको छ ।
यो विषयमा आफ्नो प्रतिक्रिया दिनुहोस् !