जनकपुरधाम, कात्तिक ३० गते । मधेश प्रदेश सरकारका ऊर्जा, सिचाई तथा खानेपानी मन्त्री शेषनारायण यादवले मिथिलाञ्चल सहित प्रदेशका लोप भइरहेका लोक पर्वहरुको संरक्षण प्रदेश सरकारले गर्ने बताएका छन् ।
शुक्रवार जनकपुरधाममा नेपाल ललितकला प्रज्ञा प्रतिष्ठान, काठमाडू र मैथिली विकास कोषद्वारा संयुक्त रुपमा आयोजित ६ दिवसीय सामा चकेवा मूर्तिकला निर्माण कार्यशाला समापन समारोहलाई सम्बोधन गर्दै प्रमुख अतिथि मन्त्री यादवले यस्तो बताए ।
उनले भने पहिला प्रत्येक गाउँघरदेखि शहरसम्म घर घरमा खेलिने मिथिलाञ्चलको लोकपर्व सामा चकेवा अहिले लोप हुने लागेकाे छ, यसको संरक्षण एवं जगेर्ना गर्न आवश्यक छ ।
प्रदेश सरकारले सामा चेकवासहितका लोकपर्वको संरक्षण एवं विस्तार गर्न प्रयासरत रहेका छन् । तर यसमा सरकारले मात्र नभई मैथिली विकास कोष जस्ता अन्य संघ संस्थाहरुको सहयोगपनि उतिकै अपरिहार्य रहेको छ ।
दिदी–बहिनीद्वारा दाजुभाइको दीर्घायु, आरोग्य र ऐश्वर्य प्राप्तिको कामनासहित द्वापर युगदेखि चली आएको यो सामा–चकेवा लोकपर्व केवल मिथिलाञ्चलमा मात्र होइन आर्यावर्तका अन्य क्षेत्रमा पनि हर्सोल्लास र लोकाचारका साथमा मनाइदै आएको छ । तर बढदो आधुनिकता सँगै यो पर्व लोप भइरहेकाे छ । यस्तो अवस्थामा मैथिली विकास कोषले सामा चकेवासहितका मूर्तिकला निर्माणको ६ दिवसीय कार्यशाला आयोजना गरेर ठूलो टेवा पुरयाएको छ ।
प्रदेश सरकारले लोप हुन लागेका यस्ता लोकपर्वको संरक्षण र विकासका लागि सहयोग गर्ने भएकाले कोष लगायतका संघ संस्थाहरुले प्रस्ताव लिएर आएमा प्रदेश सरकारले त्यसका लागि बजेट छुटयाउने जानकारी समेत दिए ।
कार्यक्रममा मन्त्री यादवले कार्यशालामा सहभागी भएका प्रशिक्षक र प्रशिक्षार्थीहरुलाई प्रमाण पत्र समेत वितरण गरेका थिए । प्रमाण पत्र वितरण गर्दै मन्त्री यादवले कार्यशालामा सिकेका सीप सामा चकेवा पर्वकालागि मात्र नभई व्यवसायीकरण गर्न अन्य मूर्तिहरु बनाएर रोजगारसँग जोडन आग्रह समेत गरे ।
कार्यक्रममा नेपाली कांग्रेस नेता एवं संघीय सांसद उदय शमशेर थापाले लोकआस्थाको पर्व सामा चकेवाको अवसरमा आयोजित मूर्तिकला निर्माण कार्यशालामा सिकेका सीपको प्रयोग सामा चकेवाको मूर्ति निर्माण मात्र नभई अन्य मूर्तिहरु निर्माण गरेर व्यवसायिक सिपसँग जोडन प्रशिक्षार्थीहरु आग्रह गरे । साथै उनले प्रदेश सरकारले यसमा सहयोग गर्नुपर्ने र आफू पनि संघीय सरकारमा यस बारे कुरा राख्ने बताए ।
मैथिली विकास कोषका अध्यक्ष जीवनाथ चौधरीको अध्यक्षतामा सम्पन्न सो कार्यक्रममा नेपाल ललितकला परिषद मूर्ति विभागका प्रमुख दिनेश्वर महतो, साहित्यकार एवं राजनीतिकर्मी रोशन जनकपुरी, प्रशिक्षक विजयदत्त मणि लगायतका वक्ताहरुले पनि सामा चकेवा पर्वकाे संरक्षणमा जाेड दिएका थिए ।
काेषले संचालन गर्न लागेकाे पुस्तकालयका लागि विभा झाले पुस्तकहरू समेत काेषका अध्यक्ष चाैधरीलाइ हस्तान्तरण गरेकी थिइन ।
यो विषयमा आफ्नो प्रतिक्रिया दिनुहोस् !