जनकपुरधाम, कात्तिक २८ गते । धनुषाको गणेशमान चारनाथ नगरपालिका –६ स्थित गोदारमा पनि नेपाल रेडक्रस धनुषाद्वारा सामुदायिक आँखा केन्द्र सञ्चालनमा आएको छ ।
उपप्रधान तथा शहरी विकास मन्त्री प्रकाशमान सिंहले एक समारोहका बीच बुधवार आँखा उपचार केन्द्रकाे उद्घाटन गरेका हुन् । श्री जानकी आँखा अस्पतालका वरिष्ठ नेत्र विशेषज्ञ डा. आशिष बोहराबाट मन्त्री सिंहकाे आँखा चेकजाँच संगै उपचार सेवाको शुभारम्भ समेत भएकाे छ ।
नेपाल रेडक्रस सोसाइटीको गोदार–लवटोली उपशाखाको व्यवस्थापमा संचालनमा हुने आँखा उपचार केन्द्र गणेशमान चारनाथ नगरपालिका मात्रै धनुषाधाम, मिथिला नगरपालिका र सिरहा जिल्लाका विभिन्न पालिकाका आँखाका बिरामीहरुलाई सेवा पाउन सहज भएको छ ।
साे आँखा उपचार केन्द्रकाे उद्घाटन गर्दै मन्त्री सिंहले यो आँखा अस्पताल संचालनमा आएपछि यस भेगका आंखाका बिरामीलाई उपचार गराउन बाहिर जानुपर्ने बाध्यता टरेको र यहाँबाट सहजै रुपमा सेवा पाउन सकिनेछ भने । उनले यस अस्पतालबाट बढीभन्दा बढी बिरामीले गुणस्तरीय सेवा पाउन भन्ने विश्वास व्यक्त गर्दै नेपाल रेडक्रस सोसाइटीले स्वास्थ्य क्षेत्रमा गर्दै आएको आँखा उपचार सेवा निकै सराहनीय रहेको भनी प्रशंसा समेत गरे ।
सो सामुदायिक अस्पतालमा दैनिक रुपमा चेकजाँच सहितको उपचार सेवा दिइनेछ भने महिनामा एक पटक मोतियाबिन्दुको शल्यक्रिया शिविर संचालन गरिने जनाइएको छ । नेपाल रेडक्रस सोसाइटीद्वारा धनुषामा श्री जानकी आँखा अस्पतालसहित यदुकोहा, सबैलामा सामुदायिक आँखा अस्पताल संचालनमा रहेको छ भने पछिल्लो पटक गोदारमा संचालन भएको छ ।
यस बाहेक रेडक्रसद्वारा सिन्धुली, सर्लाहीको लालबन्दी, महोत्तरीको गौशाला र धबौली समेत सामुदायिक आँखा अस्पतालमा संचालनमा रहेको छ । रेडक्रसद्वारा सञ्चालित आँखा अस्पतालबाट वर्षेणी डेढलाख बढी बहिरंग विभाग मार्फत उपचार सेवा र १२ हजारभन्दा बढी मोतियाबिन्दुको शल्यक्रिया गर्दै आएको नेपाल रेडक्रस सोसाइटी धनुषाका सभापति नरेश प्रसाद सिंहले जानकारी दिएका छन् ।
नेपाल रेडक्रस सोसाइटी उपशाखा गोदारका सभापति हेमनारायण यादवको सभापतित्वमा सम्पन्न सो उद्घाटन समारोहमा कार्यक्रममा राष्ट्रियसभा सदस्य आनन्द ढुङ्गाना, नेपाली कांग्रेसका सहमहामन्त्री महेन्द्र यादव, प्रदेशसभा सदस्यद्वय रत्नेश्वरलाल गोइत र संजय महतो, गणेशमान चारनाथ नगरपालिका प्रमुख जितनारायण यादव लगायतकाले शुभकामना मनतव्य व्यक्त गरेका थिए ।
कार्यक्रममा अस्पतालका जग्गादाता केदारबाबु सिंह, भवन निर्माणमा सहयोग पुरयाउने गणेशमान चारनाथ नगरपालिकाका मेयर जीतनारायण यादव, पुर्व मेयर रामबाबु सिंह, अस्पताल निर्माणमा सक्रिय भूमिका निर्वाह गरेका स्व. सुर्यनारायण लाल कर्ण लगायतका व्यक्तिहरुलाई सम्मानपत्र सहित दोसल्ला ओढाई सम्मान गरिएको थियो ।
पुर्व पश्चिम राजमार्गकाे छेउमा रहेाे साे आँखा उपचार केन्द्रका लागि जग्गादाता केदारबाबु सिंहले २ कट्ठा जग्गा र वन निर्माणका लागि गणेशमान चारनाथ नगरपालिकाले आर्थिक सहयाेग गरेका हुन् ।
यो विषयमा आफ्नो प्रतिक्रिया दिनुहोस् !