जनकपुरधाम, कातिक २६ गते । निजि (संस्थागत) विद्यालयका संगठनहरुले जनकपुरधाम उपमहानगरपालिकाले कसैकाे दबावमा कक्षा ११ र १२ का विद्यार्थीहरुरको छात्रवृति सम्बन्धि निर्णय नमान्ने अडान लिएका छन् ।
साेमवार विद्यालयका संगठनहरु प्याब्सन, एनप्याब्सन तथा हिसानले संयुक्त रुपमा पत्रकार सम्मेलनको आयोजना गरेर कुनै दलीय संगठनसंगकाे दबावमा आफ्नै निर्णय उल्टाएर षडयन्त्र तहत गरिएकाे सम्झाैता अनुरूपकाे निर्णय नमान्ने भने ।
उनीहरूले यहांका निजीलाई धरापमा पारी विद्यार्थी काठमाण्डाै तान्ने उद्देश्यले नेपाल विद्यार्थी संघ (नेवि संघ) ले षडयन्त्र तहत सम्झौता गराइ निर्णय गराइएकाे आरोप लगाए ।
हिसानका धनुषा अध्यक्ष संजीव ठाकुरले जनकपुरधामको शैक्षिक संस्था तथा यहाँको शिक्षा स्तरलाई कमजोर पार्न उपमहानगर र नेवि संघ बिच भएको सम्झौता आफूहरुलाई मान्य नरहेको बताए । आफूहरु उपमहानगरको निर्णय मान्न तयार हुँदा हुँदै पनि उपमहानगरले आफूहरुसंग कुनै छलफल नै नगरी आफ्नै निर्णय पल्टाउनु आपत्तिजनक रहेको भन्दै ठाकुरले आक्रोश व्यक्त गरे ।
उनले भने ‘कक्षा ११ र १२का विद्यार्थीहरु छात्रवृति सम्बन्धमा शैक्षिक सत्र २०८१/०८२मा उपमहानगरसंग छलफल गरेरै २०७४को ऐन अनुसार नामाङ्कन शुल्क, मासिक शुल्क र आन्तरिक परीक्षा शुल्कबाहेक अन्य शुल्कहरु लिन सकिने र पछि अनुगमन गर्ने सहमति नै भए अनुसार मिति २०८१/०५/१४ गते उपमहानगरपालिकाले नामावली सहित पत्राचार गरेको र सोही अनुसार गर्दै आए पनि नेपाल विद्यार्थी संघ धनुषाको दवाबमा पुनः मिति २०८१/०७/१४ गते फरक किसिमको निर्णय गर्नु आपत्तिजनक विषय हो ।’
यसका साथै ठाकुरले नेवि संघले चलाएको ‘मेरो शिक्षा मेरो प्रश्न’ अभियान जनकपुरधामबाहेकका शहरमा किन नचलाइएको भन्दै प्रश्न गरे ।
मोडेल मल्टिपल कलेजका संस्थापक वीरेन्द्र कुमार साहले छात्रवृत्ति वितरण कार्यविधि २०७४’ बमोजिम छात्रवृत्ति दिने निर्णयलाई खारेज गरी रजिष्ट्रेशन शुल्क र परीक्षा शुल्क मात्रै लिन पाउने भनी एउटै स्थानीय तहले फरकफरक निर्णय गर्नु लज्जास्पद रहेको बताए । उनले उपमहानगरसंग सबै पक्षसंग छलफल गरेर आफ्नै कार्यविधि बनाउन माग समेत गरे । उपमहानगरले सबै पक्षसंग छलफल गरी बनाएको कार्यविधिलाई टेकेर अगाडी बढ्न हामी तयार रहेको उनको भनाई थियो ।
तर जनकपुरधामको शैक्षिक गुणस्तर बढिरहेको समयमा यहाँका शैक्षिक संस्थालाई धाराशायी बनाउने गरी गरिएको निर्णय आफूहरु मान्न तयार नरहेको उनको भनाई थियो ।
यता निजि विद्यालयका संगठनहरुले जनकपुरधाम उपमहानगरले पुरानै निर्णय अनुसार शुल्क निर्धारण नगरे सम्पूर्ण निजि विद्यालयहरु अनिश्चितकालकालागि ठप्प पार्ने चेतावनी समेत दिएका छन् ।
निजि विद्यालयका संगठनहरुले पुरानै निर्णय अनुसार उपमहानगरले शुल्क निर्धारण नगरे निजि विद्यालयहरुमा पठनपाठन अनिश्चिकालकालागि ठप्प पार्ने चेतावनी दिएको हो ।
यो विषयमा आफ्नो प्रतिक्रिया दिनुहोस् !