जनकपुरधाम, असोज १७ गते । मधेश प्रदेशका मुख्यमन्त्री सतिश कुमार सिंहले जनकपुरधामलाई राजधानी जस्तै बनाउने गरी प्रदेश सरकारले पूर्वाधार तयार पार्ने योजनाहरु ल्याउन लागेको बताएका छन् ।
ती योजनाहरुका लागि डिपिआर तयार पार्ने काम अहिले भईरहेको उनले बताए । जनकपुरधाम उद्योग वाणिज्य सङ्घले प्रत्येक वर्ष दशैँको अवसर पारेर गोपाल धर्मशालामा लगाउँदै आएको सस्तो बजारको उदघाटन गर्दै मुख्यमन्त्री सिंहले प्रदेश सरकार जनकपुरधामलाई राजधानी जस्तै विकास गर्न गम्भिर रहेको बताए ।
उनले जनकपुरधामको ५२ विघा भनेर चिनिएको जग्गामा प्रदेश सरकारले जनक दरबार सहितको सभा हल र सरकारको अन्य पूर्वाधारको निर्माणका लागि डिपिआर तयार गर्ने काम भइरहेको बताउँदै साढे दुई अर्बको लागतमा रामजानकी अन्तर्राष्ट्रिय रङ्गशालामा क्रिकेट खेलमैदान निर्माण गरिने जानकारी दिए ।
मुख्यमन्त्री सिंहले जनकपुरधामको महिमासँग जोडिएको ऐतिहासिक तथा धार्मिक महत्वको दुधमतिको पहिलेकै स्वरूप अनुसारको विकास गर्नका लागि नक्सांकनकालागि प्राविधिक सहितका कर्मचारीहरू खटाउने काम प्रदेश सरकारबाट भएको बताए ।
उनले जनकपुरधाम क्षेत्रमा गुठी संस्थानको ९ हजार विघा जग्गा अतिक्रमणमा परेको बताउँदै जग्गाको सदुपयोग तथा त्यसको सही प्रयोगका लागि ती जग्गाहरूलाई प्रदेश सरकार मातहत ल्याउनका लागि सरकार लागि परेको जानकारी दिए ।
मधेश प्रदेशसभाका प्रदेशसभा सदस्य दिपेन्द्र ठाकुरले जनकपुरधामको समग्र विकासका लागि जनकपुर विकास प्राधिकरणको निर्माणको माग गर्दै आफूले दुई पटकसम्म प्रदेश सभाको बैठक अवरुद्ध गरेको बताउँदै जनकपुरधामको विकासका लागि प्रबुद्ध वर्ग अगाडी आउन आवश्यक रहेको बताए ।
जनकपुरधाम उद्योग वाणिज्य संघका अध्यक्ष सुरेन्द्र भण्डारीले आउने वर्षदेखि दशै सस्तो बजार गोपाल धर्मशालामा नभई तिरहुतियागाछीमा आयोजना गरिने बताए । उनले गोपाल धर्मशालामा स्थान कम पर्ने भएकाले तिरहुतिया गाछीमा सस्तो बजार लगाइने बताए । उनले सो सस्तो बजार छठसम्म लगाइने प्रतिबद्धता व्यक्त गरे ।
कार्यक्रममा प्रदेश सभाका पूर्व सदस्य परमेश्वर साह, पूर्व अध्यक्षहरू बजरंग प्रसाद साह, इन्जिनियर प्रकाशचन्द्र साह, ललित साह, रामनरेश साह, नेपाल पत्रकार महासङ्घ धनुषाका उपाध्यक्ष अवधेश कामत लगायतले बोलेका थिए । ,बिहिबारबाट शुरु भएको दशँै बजार २५ गतेसम्म चल्नेछ ।
दशै बजारमा ९७ वटा स्टल रहेको जनकपुरधाम उद्योग वाणिज्य संघका महासचिव फूलदेव पण्डितले जानकारी दिए । दशै बजारमा दैनिक उपभाग्यका सामाग्रीहरू, खाद्यान्न, लत्ता कपडा, कष्टमेटिक्सका सामानहरू रहेका छन् ।
यो विषयमा आफ्नो प्रतिक्रिया दिनुहोस् !