जनकपुरधाम, भदौ ३० गते । जनकपुरधाम उपमहानगरपालिकाका मेयर मनोज साहको अध्यक्षतामा सरकारी विद्यालयमा उपलब्ध स्वछता एवं खानेपानी सुविधाका स्तराेन्नति परियाेजनाकाे सल्लाहकार समिति गठन गरिएकाे छ ।
विद्यार्थीहरुको अतिरिक्त क्रियाकलापसहित स्वच्छता र खानेपानी सुविधामा सुधार गर्ने सम्बन्धी सरकारी विद्यालयमा सामुदायिक सुधार केन्द्र (सीआईसी) द्वारा सञ्चालित कार्यक्रमको अनुगमनका लागि साे स्थानीय परियोजना सल्लाहकार समिति गठन गरिएको हाे ।
मेयर साहको अध्यक्षतामा गठित सो समितिको सदस्यहरुमा उपमहानगरपालिकाका उपमेयर किशोरी साह, सामाजिक समितिका संयोजक मिथिलेश कर्ण, जउनपा ९ का वडाध्यक्ष परमेश्वर साह, जउनपा २५ का वडाध्यक्ष चन्देश्वर साह, उपमहानगर शिक्षा शाखाका प्रमुख अन्जु पाण्डे र सामाजिक विकास शाखाका प्रमुख सुनिल झा रहेका छन् ।
आइतवार सम्पन्न एक कार्यक्रमका बीच सो कमिटी गठन गरिएको हो । कार्यक्रममा सीआईसीका अध्यक्ष संजय साहले कार्यक्रमको उद्देश्य, कार्यक्रम अन्तर्गतका क्रियाकलाप र बजेटसहित परियोजना बारे जानकारी गराउंदै कमिटीले अनुगनमा गर्न सक्ने क्रियाकलाप र राय सल्लाह सुझाव दिने बारे मेयर साहसहितका उपस्थित व्यक्तिहरुलाई बताएका थिए ।
वल्र्ड शेयरको आर्थिक सहयोगमा जनकपुरधाम उपमहानगर वडा नम्बर ९ स्थित श्री जानकी मावि र वडा नम्बर २५ स्थित श्री कण्टिर झा माध्यमिक विद्यालय बभनगामा सो परियोजनाको कार्यक्रम संचालनमा रहेको छ ।
परियोजना अन्तर्गत ती दुवै विद्यालयमा विद्यार्थीहरुका लागि शौचालय अत्याधुनिक रिमोडिलिङ्ग, खानेपानीका लागि चापाकल, फिल्टरसहितको ट्यांक निर्माण र स्वच्छतातर्फ स्वास्थ्य चेकजाँचका लागि नर्स व्यवस्थापन र अतिरिक्त क्रियाकलापको कक्षा संचालनसहित वाश बारे क्षमता अभिवृद्धिका लागि शिक्षकहरुलाई प्रशिक्षण दिइदै आएको छ ।
दुईवर्षसम्म चल्ने सो परियोजना अन्तर्गत कार्यशाला र एमपीएसी गठन, वर्कशप, बालबालिकालाई सेनेटरी प्याडको व्यवस्था, आधारभूत स्वास्थ्य शिक्षा कार्यक्रम अनुसन्धान र विकास टोली गठन तथा संचालन, आधारभूत स्वास्थ्य शिक्षा सामाग्रीको उत्पादन र वितरण लगायतका कार्य पनि गरिने जनाइएको छ ।
कार्यक्रमको प्रभावकारिताका पालिका नगरप्रमुखको अध्यक्षतामा परियोजना सल्लाहकार समिति गठन गरिने छ र ती समितिले नै अनुगमन र निरिक्षण गर्नेछ । यसका साथै पब्लिक अडिट गराउने कार्यक्रम समेत रहेको अध्यक्ष साहले जानकारी दिए ।
यो विषयमा आफ्नो प्रतिक्रिया दिनुहोस् !