जनकपुरधाम, साउन ३१ गते । प्रदेश सरकारको प्रशासनिक भवन आभाव टार्न मधेश सरकारका मन्त्रिपरिषद् टोलीले जनकपुरधामस्थित प्रयोगविहिन सरकारी भवनहरुलाई प्रयोगमा ल्याउन अनुगमन गरेको छ ।
मुख्यमन्त्री सतिश सिंहको नेतृत्वमा मधेश सरकार मन्त्रिपरिषद् टोलीले प्रयोगविहीन दुइवटा सरकारी भवनहरुको स्थलगत अनुगमन गरेको उर्जा, सिचाई तथा खानेपानी मन्त्री शेषनारायण यादवले जानकारी दिएका छन् ।
उनका अनुसार जनकपुरधामको नक्टाझिभस्थित कृषि निर्देशनालय र मुजेलियास्थित मणिपाल भवनको प्रदेश सरकारले अनुगमन गरेको हो । प्रदेश सरकारसंग भवनको अभाव भएकोले विकल्पमा प्रयोग गर्नका लागि संघीय सरकार स्वामित्वमा रहेका प्रयोगविहीन भवनहरुको अनुगमन गरिएको मन्त्री यादवले बताए ।
जनकपुरस्थितका प्रयोगविहीन तथा जीर्ण भवनहरुको मधेश सरकारको मन्त्रिपरिषद्ले दुइवटै भवनको वस्तुस्थिति बुझ्ने काम गरेको उनले बताए । उनले भने ‘प्रदेश सरकारमा चारवटा मन्त्रालयहरु ‘रेड जोन’ मा छन्, मधेश स्वास्थ्य विज्ञान प्रतिष्ठानमा सेवाग्राहीको चाँप अनुसार पर्याप्त ठाउँ नभएकाले यी दुइ ठाउँको प्रयोगविहीन भवनको अवलोकन गरिएको हो, मरम्मत सम्भार गरी संचालनमा ल्याउने प्रदेश सरकारको रहेको छ ।’
उनले थप्दै भने ‘आज मुख्यमन्त्री सहित सबै मन्त्रीज्यूहरु सल्लाह गरेर अनुगमन गरेका हौं, यी कार्यालयहरु संघीय सरकार मातहत छन् । समन्वय गरेर स्वीकृति लिई प्रदेश सरकारले विकल्पमा प्रयोग गर्ने योजना बनाएको हो । संघीय सरकारले सहमति दिएमा सबै जीर्ण भवनहरुलाई मर्मत तथा व्यवस्थित गरेर प्रयोगमा ल्याइनेछ ।’
सो अवलोकन टोलीमा भौतिक पूर्वाधार विकास मन्त्री सरोज यादव, स्वास्थ्य तथा जनसंख्या मन्त्री शत्रुध्न सिंह कोइरी, शिक्षा तथा संस्कृति मन्त्री रानीशर्मा तिवारी लगातका मन्त्रीहरुको सहभागिता रहेको थियो ।
यो विषयमा आफ्नो प्रतिक्रिया दिनुहोस् !