जनकपुरधाम, असार २२ गते । मधेश प्रदेशका मुख्यमन्त्री सतिश कुमार सिंहले विश्वासको मत पाएका छन् । शनिवार बसेको प्रदेशसभा बैठकमा उपस्थित जम्मा १०१ सांसदमध्ये ६७ जना सांसदले मुख्यमन्त्री सिंहको पक्षमा मतदान गरेका छन भने ३४ जना सांसदले विपक्षमा मतदान गरेको हो ।
माओवादी र एकीकृत समाजवादीको समर्थनमा बनेको सिंह नेतृत्वको सरकारले भने विश्वासको मतको विपक्षमा मतदान गरेका छन् भने कांग्रेस, एमाले, जनमत, लोसपाले पक्षमा मतदान गरेको छ । जसपा नेपालले पनि सरकारको विपक्षमा मतदान गरेको थियो ।
मुख्यमन्त्रीले विश्वासको मत पाएसँगै मन्त्रीपरिषद विस्तारको प्रक्रिया शुरु भइसकेको छ । माओवादी केन्द्र, नेकपा एस, नागरिक उन्मुक्ति पार्टी र नेपाल संघीय समाजवादी पार्टीका बर्खास्त गरिएका मन्त्रीहरुको मन्त्रालय कांग्रेस र लोसपाको भागवण्डामा परेको हो । एमाले र जनमत आ आफ्नै मन्त्रालयमा यथावत छन् ।
श्रोतका अनुसार कांग्रेसले ४ र लोसपाले एक मन्त्रालय पाउने पक्कापक्की भएको छ । कांग्रेसले दाबी अनुसार ४ मन्त्रालय निश्चित रहेको छ भने लोसपालाई एउटा मन्त्रालय दिने तयारी मुख्यमन्त्री सिंहले गरेका छन् । कांग्रेसले माओवादी केन्द्रले सम्हाल्दै आएको अर्थ मन्त्रालय, उद्योग, पर्यटन तथा वातारण मन्त्रालय र नेकपा एसले पाएका उर्जा, सिचाई तथा खानेपानी मन्त्रालय, भूमि व्यवस्था, कृषि तथा सहकारी मन्त्रालय पाउने सम्झदारी भएको बुझिएको छ ।
कांग्रेसले चारवटा मन्त्रालय पाएपनि को को मन्त्री बन्ने यो समाचार लेख्दासम्म टुँगो लागेको थिएन । हुनत पार्टी श्रोतका अनुसार सुनिल यादव, शेषनारायण यादव, कौशलकिशोर यादव, जर्नादन क्षेत्री, श्याम पटेल र जंगीलाल राय यादवको नाम मन्त्रीका लागि तय गरिएको थियो । तर श्याम पटेल र जंगीलाल राय यादवको नाम हटाइएको छ । जर्नादन क्षेत्री र श्याम पटेल दुवै पर्सा जिल्लाकै भएको कारण श्याम पटेललाई र जंगीलालको ठाउंमा कौशलकिशोर यादवको नाम आएपछि उनलाई हटाइएको बुझिएको छ ।
यो समाचार तयार पार्दासम्म कसले कुन मन्त्रालय पाउने टुँगो लागेको थिएन । भोली बिहान ८ बजे बस्ने बैठकबाट पार्टीको निर्देशनानुसार मन्त्रालय तोकिने पार्टी श्रोतले जनाएको छ । मन्त्रालय टुँगिएपछि भोली नै शपथ ग्रहण नवनियुक्त मन्त्रीहरुको गराइएनेछ । शनिवार नै शपथग्रहण गराइने कार्यक्रम रहेको थियो । तर नाम र मन्त्रालय टुँगो नलागेको कारण भोली आइतवारका लागि सारिएको मुख्यमन्त्री कार्यालय श्रोतले जनाएको छ ।
यता लोसपाले दुईवटा मन्त्रालय पाए मात्रै सरकारमा सहभागी हुने अडानमा छन् । लोसपाका एक सांसदले भने हामीले दुईवटा मन्त्रालय माग गरेका छौं । त्यो पनि आफूले बांकी रहेका ६ वटा मध्ये रोजेको मन्त्रालय । भोली बिहान ८ बजेका लागि मुख्यमन्त्रीज्यूले बैठक राख्नु भएको छ । त्यसबाट छिनोफानो हुने हामी सरकारमा जाने कि नजाने ।
लोसपाले दुईवटा मन्त्रालय पाए भने गृह, सञ्चार तथा कानून र श्रम, रोजगार तथा यातायात मन्त्रालय पाउनेछ मुख्यमन्त्री श्रोतको भनाई छ । लोसपासँग कुरा टुँगिए भोली आइतवार नै यिनीहरुपनि कांग्रेसका मन्त्रीहरुसँगै शपथ ग्रहण गर्नेछ ।
यो विषयमा आफ्नो प्रतिक्रिया दिनुहोस् !