जनकपुरधाम, जेठ १९ गते । पत्रकार सुजीतकुमार झाको १६ औं कृति ‘अन्हार घरमे डिबिआ’ शब्द–चित्रको शनिवार एक समारोहका बीच लोकार्पण गरिएको छ । जनकपुरधामका २७ जना व्यक्तिको जिवनी समेटिएको मैथिली भाषाको सो पुस्तकको मधेश प्रदेशका सभामुख रामचन्द्र मण्डलले लोकार्पण गरेको हो ।
पुस्तकको लोकार्पण गर्दै सभामुख मण्डलले पठन संस्कृतिको विकासका लागि निरन्तर लेखन र पुस्तक प्रकाशन आवश्यक रहेको बताए । उनले पुस्तक प्रकाशनमा सहयोगका लागि प्रदेश सरकार र स्थानीय सरकारले नयाँ निति ल्याउनुपर्ने समेत बताए । उनले भने ‘समाजलाई अग्रगति दिने पुस्तक तथा लेखनमा मेरो सहयोगको सधै प्रतिबद्धता हुन्छ । समाजमा काम गर्ने वा नगर्ने व्यक्तिमा गतिशिलता हुन्छ, तै पनि प्रतिभाहरुलाई जीवन मुल्य, जीवन व्यवहारलाई सजिव बनाउन जिवन मुल्यको व्यवहार सिकाउने भएकोले सदैव सहयोगमा साथ रहनेछु ।
यसअघि पत्रकार झाको मैथिली भाषामा उहाँको चिड़ै कथा संग्रह, रिपोटर डायरी, जिद्दी कथा संग्रह, गन्ध कथा संग्रह, कोइली घूरि आउ बालकथा संग्रह, खजुरीबाली कथा संग्रह, बुलबुल कथा संग्रह, तितलीसंग दोस लगाएब बालकथा संग्रह, सीताराम विवाहपर अनुसन्धान एवं विश्लेषण पुस्तक ‘पुनि पुनि होत विवाह’ कृति प्रकाशित भई सकेको छ । ६ वटा अनुवाद पुस्तक पनि उनको प्रकाशित भएको छ ।
लोकार्पण कार्यक्रममा जानकी मन्दिरका उत्तराधिकारी महन्थ रामरोशन दास वैष्णवले लेखनकाज धेरै कठिन कार्य रहेको र यसका लागि राज्यले विशेष व्यवस्था गर्नुपर्ने आवश्यक्तामाथि जोड दिए । मैथिलीका वरिष्ठ साहित्यकार डा. रेवतीरमण लालले साहित्यको सबै क्षेत्रमा लेखन कार्यलाई बढाउनु पर्छ बताउँदै सुजीतको लेखनको यही विशेषता रहेको छ उनले कथा कविता मात्रै होइन विविध क्षेत्रमा लेखन गर्नुहुन्छ भनी प्रशंसा गरे ।
तमलोपका राष्ट्रिय अध्यक्ष वृषेशचन्द्र लालले मैथिलीमा प्रकाशनको समस्या भन्दा पठन समस्या बढिरहेकोले पठन तर्फ अभियान चलाउनुपर्ने आवश्यकतामाथि जोड दिए । वरिष्ठ चिकित्सक एवं तमलोपाका वरिष्ठ नेता डा. विजय कुमार सिंहले ‘अन्हार घरमे डिबिआ’ पुस्तकको विशेषता भनेको नकारात्मकतावाट सकारात्मकतामा ल्याउनु रहेको बताए । मैथिली विकास कोषका अध्यक्ष जीवनाथ चौधरीको अध्यक्षतामा भएको सो कार्यक्रममा पुस्तकमाथी मनोज साह, अनुज मिश्र र विभा ठाकुरले समिक्षा गरेका थिए ।
यो विषयमा आफ्नो प्रतिक्रिया दिनुहोस् !