मधेशमा जनमतको नेतृत्वमा सरकार बन्ने निश्चित

जनकपुरधाम, जेठ १९ गते । दलहरुबीचको लामो रस्साकस्सीपछि अन्ततः जनमत पार्टीको नेतृत्वमा मधेश प्रदेश सरकार बन्ने निश्चित भएको छ ।

सत्ता गठबन्धनको दबावपछि नेकपा एसको अध्यक्ष माधव नेपालले आश्वासन दिएप्छि जनमतको नेतृत्वमा मधेशमा नयाँ सरकार बन्ने निश्चित भएको हो । नेकपा एमाले र माओवादी केन्द्रसँगको गठबन्धनलाई माधव नेपालले मधेश प्रदेश सरकारका लागि सहमति जनाएपछि यो सम्भव भएको बताइएको छ ।

एमाले निकट विश्वसनीय स्रोतको अनुसार उपेन्द्र यादव नेतृत्वको जसपालाई मधेश प्रदेशको सत्ताबाट बहिर्गमनका लागि एमालेले हदैसम्मको लचकता अपनाएपछि माधव नेपालले जनमतको नेतृत्वमा सरकार बनाउन तयार भएका हुन् ।

प्रारम्भिक अवस्थामा भएको सहमति अनुसार जनमतलाई मुख्यमन्त्री, एमालेले भौतिक पूर्वाधार, माओवादीले अर्थ र एकीकृत समाजवादीलाई स्वास्थ्य मन्त्रालय दिने कुरा भएको छ । बाँकी मन्त्रालयको सन्दर्भमा मुख्यमन्त्री सहित यी चार मन्त्रीले पदभार ग्रहण गरे लगत्तै टुंग्याइने श्रोतको दाबी छ ।

यसैबीच जनमत पार्टीको नेतृत्वमा सत्ता गठबन्धनले भोली आइतबार प्रदेश प्रमुखलाई ध्यानाकर्षण पत्र बुझाउने भएको छ । जनमत पार्टीका मधेश प्रदेश संसदीय दलका नेता महेश यादवको नेतृत्वमा सरकार बनाउन कानुनले निर्धारण गरे बमोजिमको बहुमत आफुहरुसँग रहेको उल्लेख गर्दै प्रदेश प्रमुख सुमित्रा सुवेदी भण्डारी समक्ष ध्यानाकर्षण पत्र बुझाउने तयारी भएको एमाले संसदीय दलका नेता सरोज कुमार यादवले जानकारी दिए ।

उक्त ध्यानाकर्षण पत्रमा एमाले, माओवादी केन्द्र, एकीकृत समाजवादी र जनमत पार्टीका संसदीय दलका नेताहरुले हस्ताक्षर गर्नेछन् । यो सहमतिमा लोसपालाई ल्याउने तयारी पनि भइरहेको यादवले बताए । ओली र प्रचण्ड भेट्नुअघि अध्यक्ष नेपाललाई एमाले मधेशका संसदीय दलका नेता सरोज कुमार यादव, माओवादी मधेश संसदीय दलका नेता भरत प्रसाद साह र जनमतका मधेश संसदीय दलका नेता महेश प्रसाद यादव पनि भेटघाट गरेका थिए । उनीहरुलाई पनि अध्यक्ष नेपालले मधेशमा नयाँ सरकार बनाउन सहयोग गर्ने आश्वासन दिएको बुझिएको छ ।

हुनत मुख्यमन्त्री सरोजकुमार यादव संवैधानिक व्यवस्था अनुसार जेष्ठ २३ मा विश्वासको मत लिने तयारी गरेका छन् । तर त्यसअघि नै जनमतको नेतृत्वमा नयाँ सरकार बनाउने सत्ता गठबन्धनले तयारी अघि बढाएका छन् ।

यता मधेस प्रदेशमा नेकपा (एकीकृत समाजवादी)ले जनता समाजवादी पार्टी नेपाललाई नसघाउने बुझिएको छ । शनिवार नेकपा (एकीकृत समाजवादी)का अध्यक्ष माधवकुमार नेपाल र जसपाका प्रवक्ता एवं कार्यकारिणी सदस्य मनिष सुमनबिचको भेटमा अध्यक्ष नेपालले सो कुराको बताएका हुन् ।

भेटमा अध्यक्ष नेपालले आफ्नो पार्टी केन्द्र सरकारमा रहेको र अन्य प्रदेशमा पनि सहभागी भएको बताउँदै यस्तो अवस्थामा विपक्षी गठबन्धनलाई सघाउन नमिल्ने स्पष्ट पारेको स्रोतले दाबी गरेको छ । भेटघाटका क्रममा उनले आफ्नो पार्टीभित्र पनि समस्या भएको बताएका थिए । अध्यक्ष नेपालले छलफलका क्रममा भनेका थिए, ‘मधेस प्रदेशको विपक्षी गठबन्धनमा जसपा नेपाललाई सघाउन मन भए पनि पार्टीमा अन्य नेताहरूले नमान्ला जस्तो छ, अरू पार्टीभन्दा हाम्रो पार्टीको अवस्था अलि फरक रहेका कारण समर्थन गर्न गा¥हो हुने भयो ।’

तर प्रवक्ता सुमनले एकीकृत समाजवादी मुख्यमन्त्री सरोज यादवलाई विश्वासको मत दिनेमा सकारात्मक रहेको दाबी गरेका । अध्यक्ष नेपालले पार्टीको सचिवालय बैठकमा यसबारे छलफल गरी निर्णय लिने आफूलाई जानकारी गराएको समेत उनले बताए ।