जनकपुरधाम, जेठ १४ गते । नेपाल पत्रकार महासंघ केन्द्रिय सदस्य साधारण सदस्यहरुको नवीकरण र नयाँ सदस्यताको विवरण जानकारी गरेकोमा महासंघको मधेश प्रदेश समितिले विरोध जनाएको छ ।
सोमवार एक विरोध पत्र जारी गरी जिल्ला कार्य समितिले सिफारिस नगरेको र प्रदेश समितिले समेत नाम नपठाएकाहरुको सदस्यता नविकरण गर्नु र नयाँ सदस्यता प्रदान गर्नु गैरवैधानिक र गैरनैतिक कार्य रहेको भनी भर्त्सना गर्दै विरोध जनाएका छन् ।
नेपाल पत्रकार महासंघका केन्द्रिय अध्यक्ष र महासचिवले हस्ताक्षर गरेको सदस्यता नामावलीमा स्थायी कर्मचारी, स्थायी शिक्षक, मृत्यु भैसकेका, सदस्यताबाट राजिनामा दिइसकेका तथा सदस्यताका लागि जिल्ला र प्रदेश समितिमा आवेदन नदिएका व्यक्तिहरुका नाम समेत रहेको मधेश प्रदेश समितिका अध्यक्ष राजेशकुमार कर्णले जारी गरेको विरोधपत्रमा दाबी गरिएको छ ।
उनले गैरवैधानिक तरिकाले नविकरण गर्नु र नयाँ सदस्यता प्रदान गर्नु आपतिजनक हो। नेपाल पत्रकार महासंघलाई शुद्धिकरणको नाममा निजीकरण नगर्न र नेपाल पत्रकार महासंघको इतिहासलाई कलंकित हुन नदिन सचेत समेत गराएका छन् ।
नेपाल पत्रकार महासंघको जिल्ला कार्य समिति र प्रदेश कार्य समितिले पठाएको नामावली मध्येवाटै सदस्यताको नविकरण गर्न र नयाँ सदस्यता प्रदान गर्न माँग गर्दै वर्तमान अवस्थामै नेपाल पत्रकार महासंघ प्रदेश समितिको निर्वाचन गराउन असहज रहेको भनी जानकारी पनि गराएको छ ।
यो विषयमा आफ्नो प्रतिक्रिया दिनुहोस् !