जनकपुरधाम, चैत ३ गते । धनुषाका गणेशमान चारनाथ नगरपालिका ७ सन्तनगरमा वर्षौदेखि झुपडी बनाएर अव्यवस्थित बसोबास गर्दै आएका सुकुम्बासीका लागि उपचारित बाँससहितको पक्की घर निर्माण गर्ने कार्य शुरु भएको छ ।
नगरपालिकाको वडा नं. ७ स्थित सन्तनगरमा रहेका सुकुम्बासी र अव्यवस्थित बसोबास भएका परिवारका लागि उपचारित बाँसको घर निर्माणका लागि शनिवार शिलान्यास गरिएको छ । मधेश प्रदेशका सभा सदस्य सञ्जय महतो, नगरपालिकाका मेयर जितनारायण यादव, उपमेयर तुलसाकुमारी पाण्डे र वडाध्यक्ष दिपेन्द्र कार्कीले संयुक्त रुपमा सो घर निर्माणका लागि शिलान्यास गरेका हुन ।
गणेशमान चारनाथ नगरपालिका, ह्याविट्याट फर ह्युमिन्टि इन्टरनेशनल नेपालको सहयोगमा सामुदायिक सुधार केन्द्र धनुषाले सो घर निर्माण लागेका हुन् । घर निर्माण गर्न एक करोड ८४ लाख रुपियाँ खर्च हुने जनाइएको छ । जसमध्ये एक करोड २४ लाख रुपियाँ नगरपालिका र ६० लाख रुपियाँ ह्याविट्याट र सामुदायिक सुधार केन्द्रले खर्च गर्नेछन् ।
वर्षौदेखि सुकुम्बासीभई ऐलानी पर्ती जग्गामा बसोबास गर्दै अव्यवस्थित परिवारका लागि स्थायी र व्यवस्थित बसोबासका लागि नगरपालिकाबाट सन्तनगरमा रहेको ४३ बिघा नदी उकास जग्गामा प्रतिपरिवार १० धुरको दरले निशुल्क रुपमा जग्ग्गा उपलब्ध गराई घर निर्माण गराउन लागेको गणेशमान चारनाथ नगरपालिकाका नगर प्रमुख जितनारायण यादवले बताए ।
उनले घर मात्रै होइन शौचालय, खानेपानी, बिजुली बत्तिसहितको व्यवस्थित निर्माण गरी एकीकृत नमूना बस्ती बनाउन लागिएको बताउँदै नागरिकको सुरक्षित आवासका लागि नगरपालिकाले यो योजना अघि बढाएको जानकारी दिए । घर पाउने परिवारलाई जग्गाको लालपूर्जा समेत बनाई दिने मेयर यादवले बताए ।
सामुदायिक सुधार केन्द्र धनुषाका अध्यक्ष सञ्जयकुमार साहले अव्यवस्थित बसोबासीका लागि जग्गासहितको सुरक्षित आवास निर्माण गर्न लागिएको बताए । एउटा घर निर्माणमा पाँच लाख रुपियाँभन्दा बढी खर्च लाग्ने बताउंदै उनले प्रत्येक परिवारका लागि दुई वटा कोठा, भान्छा र शौचालय निर्माण गरिने जानकरी दिए । जस्ताको छाना, बाँसको टाटीमा दुवैपट्टिबाट तारजाली राखेर प्लाष्टर सहितको घर निर्माण गरिनेछ ।
अध्यक्ष साहले घर निर्माणपछि सुकुम्बासी परिवारको आयस्तरमा वृद्धि ल्याउन, बालबालिकाको शिक्षा, शिशु तथा वृद्धवृद्धाको स्याहार गर्न विभिन्न कार्यक्रम सञ्चालन गरिने बताउंदै त्यसका लागि विभिन्न सङ्घसंस्थासँग सम्झौतासमेत भइसकेको जानकारी दिए ।
वर्षौदेखि ऐलानी जग्गामा झुपडी बनाएर सन्तनगर अव्यवस्थित बसोबासे गर्दै आएका दुसाद, मण्डल, यादव र थारु जतिका ३६ घरधुरी घर निर्माण हुन लागेको हो । आफूहरु जग्गाको स्वामित्वसहित बसोबासका निम्ति बांससहितको पक्की घर बन्ने भएपछि निकै खुसी देखिएका छन् ।
यो विषयमा आफ्नो प्रतिक्रिया दिनुहोस् !